އިޒްރޭލުގެ އުތުރަށް ހިޒްބުﷲ އިން ރޮކެޓުން ހަމަލާތަކެއްދީފި

ހިޒުބުﷲ އިން އިސްރާޢީލަށް ގިނަ ހަމަލާތަކެއް ދޭންފަށައިފި

ތެލް އަވީވް ހިމެނޭ ގޮތުން އިޒްރޭލުގެ އުތުރު ސަރަހައްދުތަކަށް އަމާޒުކޮށް ލުބުނާނުގެ ހަތިޔާރުއެޅި ޖަމާޢަތް ހިޒްބުﷲ އިން ރޮކެޓް ހަމަލާތަކެއް ދީފިއެވެ.

މި ހަމަލާތައް އަމާޒުކޮށްފައިވަނީ ހައިފާ ސިޓީ ކައިރީގައިވާ ކަނޑުގެ ބޭސްއަކަށާއި ތެލް އަވީވްގެ ބައެއް އަވަށްތަކަށެވެ.

ހިޒްބުﷲ އިން ނެރުނު ބަޔާނެއްގައި ބުނެފައިވާ ގޮތުގައި، ހައިފާގެ އުތުރު ހުޅަނގުގައިވާ ސްޓެލާ މާރިސް ކަނޑުގެ ބޭސްއަކަށް "ރޮކެޓް ފުންޏެއް" އޮއްސާލާފައިވެއެވެ. އަދި އޭގެ ފަހުން އަންގާރަ ދުވަހު ތެލް އަވީވްގެ ރަށްފުށު ސަރަހައްދުގެ ދެ ތަނަކަށްވެސް ހަމަލާދީފައިވާ ކަމަށް އެ ޖަމާޢަތުން ބުނެފައިވެއެވެ.

އިޒްރޭލުގެ ފަރާތުން މި ހަމަލާއާ ގުޅޭގޮތުން ނެރުނު ބަޔާނުގައި ބުނެފައިވަނީ ރޮކެޓްތައް ވެއްޓުނީ ހުސް ބިންތަކަށް ކަމަށެވެ. ނަމަވެސް ހަމަލާތަކާ ގުޅިގެން އިޒްރޭލުގެ ތިން ސަރަހައްދެއްގައި ސައިރަން އަޑު އިވިފައިވާ ކަމަށް އެ ބަޔާނުގައި ފާހަގަކޮށްފައިވެއެވެ.

މިއީ ފާއިތުވި އަހަރުގެ އޮކްޓޯބަރު މަހުން ފެށިގެން އިޒްރޭލާއި ހިޒްބުﷲ އާ ދެމެދު ހަމަލާތައް ބަދަލުކުރަން ފެށި ފަހުން، އިޒްރޭލުގެ ޕޯޓް ސިޓީއަށް އަމާޒުކޮށް ހިޒްބުﷲ އިން ދިން ފުރަތަމަ ހަމަލާއެވެ. މި ހަމަލާތައް އައިސްފައިވަނީ އިޒްރޭލުން ދެކުނު ލުބުނާނުގައި ހަމަލާތައް ފުޅާކޮށް، ބެއިރޫތުގެ ދެކުނު ސަރަޙައްދުތަކަށް ބާރުގަދަ ހަމަލާތައް ދެމުންދާ ދަނޑިވަޅެއްގައެވެ.

ދެ ފަރާތުގެ މެދުގައި ހަމަލާތައް އިތުރުވަމުންދާއިރު، ސަރަޙައްދުގެ ހަމަޖެހުމަށް ނޭދެވޭ އަސަރުކޮށްފާނެކަމުގެ ބިރު ބައިނަލްއަޤްވާމީ މުޖުތަމަޢުން ފާޅު ކުރަމުންދެއެވެ.

ހިޒްބުﷲ އިސްރާޢީލް