ފަތުރުވެރިކަމުގެ މުސްތަޤުބަލާމެދު މަޝްވަރާކުރުމަށް ޤައުމީ މަހާސިންތާއެއް ފަށައިފި

ރާއްޖޭގެ ފަތުރުވެރިކަމުގެ މުސްތަޤުބަލާމެދު މަޝްވަރާކުރުމަށް ބޭއްވޭ ޤައުމީ މަހާސިންތާ މިއަދު ކްރޮސްރޯޑްސް މޯލްޑިވްސްގައި ފަށައިފިއެވެ.

މި މަހާސިންތާ އިންތިޒާމުކޮށްފައިވަނީ މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ) އާއި ޓޫރިޒަމް މިނިސްޓްރީ ގުޅިގެންނެވެ.

މި މަހާސިންތާގައި 150 އަށްވުރެ ގިނަ ބައިވެރިން ހިމެނޭއިރު، އޭގެ ތެރޭގައި ރިސޯޓްތަކާއި ގެސްޓްހައުސްތަކާއި ލިވަބޯޑު އަދި ލޯކަލް ޓުއަރިޒަމްގައި ހަރަކާތްތެރިވާ ފަރާތްތަކާއި ޓްރެވަލް އެޖެންޓުންގެ އިތުރުން ފަތުރުވެރިކަމާ ބެހޭ ޖަމިއްޔާތަކާއި ޓްރެވަލް މީޑިއާތައް ހިމެނެއެވެ. މީގެ އިތުރުން، ޓޫރިޒަމް މިނިސްޓަރު އިބްރާހިމް ފައިސަލާއި އެމްއެމްޕީއާރްސީގެ މެނޭޖިން ޑިރެކްޓަރު ޝިއުރީ އިބްރާހިމާއި އެމްއެމްޕީއާރްސީގެ ޗެއަރޕާސަން އަބްދުﷲ ގިޔާސް ވެސް މި މަހާސިންތާގައި ބައިވެރިވެވަޑައިގަންނަވައެވެ.

އެމްއެމްޕީއާރްސީން މަޢުލޫމާތު ދެއްވިގޮތުގައި މި މަހާސިންތާގެ މަޤުޞަދަކީ ރާއްޖޭގެ ފަތުރުވެރިކަން އިތުރަށް ކުރިއެރުވުމަށްޓަކައި ކުރެވިދާނެ ކަންތައްތަކާ ބެހޭ ގޮތުން ދާއިރާގެ ފަރާތްތަކާއި މަޝްވަރާކޮށް، އާ ޚިޔާލުތަކާއި ވިސްނުންތައް ދެނެގަތުމެވެ. މިގޮތުން، ފަތުރުވެރިކަމަށް އާ ސެގްމަންޓްތައް ތައާރަފުކުރުމަށް މަޝްވަރާކުރުމަށް އެޖެންޑާ ކުރެވިފައިވާއިރު، ޕެނަލް ޑިސްކަޝަންއަކާއި ގްރޫޕް ޑިސްކަޝަންތައް ވެސް ކުރިއަށް ގެންދިއުމަށް ވަނީ ނިންމާފައެވެ.

މި މަހާސިންތާއަކީ ރާއްޖޭގެ ފަތުރުވެރިކަމުގެ މުސްތަޤުބަލަށް މުހިންމު މަޝްވަރާތަކެއް ކުރެވި، އާ އައު ވިސްނުންތަކެއް އުފެދިގެންދާނެ ފޯރަމެއް ކަމަށް އުންމީދު ކުރެވެއެވެ.