ދުންފަތުގެ ޓެކްސް ބޮޑުކޮށް، ވޭޕް މަނާކުރުމަށް އިސްލާހު ހުށަހަޅައިފި

މެންބަރު އިބްރާހީމް މުހައްމަދު (އިއްބެ ޖަނާބު) އެވެ.

ސިނގިރޭޓާއި ދުންފަތުން ނަގާ ޓެކްސް ބޮޑުކޮށް، އީ-ސިނގިރޭޓު އަދި ވޭޕު މަނާކުރުމަށް އެކްސްޕޯޓް އިންޕޯޓް ގާނޫނަށް އިސްލާހެއް ހުށަހަޅައިފިއެވެ.

ސަރުކާރުގެ ފަރާތުން މި އިސްލާހު ހުށަހެޅުއްވީ މައްޗަންގޮޅީ އުތުރު ދާއިރާގެ މެންބަރު އިބްރާހީމް މުހައްމަދު (އިއްބެ ޖަނާބު) އެވެ.

އިސްލާހުގެ މައިގަނޑު މަގުސަދަކީ ދުންފަތާއި، ދުންފަތުން އުފައްދާ ބާވަތްތަކާއި ދުންފަތުގެ ބަދަލުގައި ބޭނުންކުރެވޭ ބާވަތްތަކުން ނަގާ އިމްޕޯޓް ޑިއުޓީ އިތުރުކުރުމެވެ. އަދި އީ-ސިނގިރޭޓާއި ވޭޕް ކުރުމަށް ބޭނުންކުރާ އާލާތްތައް ރާއްޖެއަށް އެތެރެކުރުން މަނާކުރެވޭ ތާރީޚާ ހަމައަށް، މި މުއްދަތުގައި ރާއްޖެއަށް ގެނެވޭ އެފަދަ ތަކެތިން ނަގާ އިމްޕޯޓް ޑިއުޓީގެ މިންވަރު އިތުރުކުރުމެވެ.

މީގެ އިތުރުން، އެކްސްޕޯޓް އިމްޕޯޓް ގާނޫނުގެ ދަށުން ނެގޭ އިމްޕޯޓް ޑިއުޓީއާއި ރޯޔަލްޓީއާއި ރެވެނިއު ފީ މަޢާފްކުރެވޭ ހާލަތްތަކާއި އުސޫލުތައް ބަޔާންކުރުމަށްވެސް މި އިސްލާިސްލާހުގައި ހިމެނެއެވެ. މެންބަރު އިއްބެ ވަނީ މި ބިލުގެ މަސައްކަތް ކޮމިޓީން އަވަހަށް ނިންމައި ފާސްކުރުމަށް އެދިވަޑައިގެންފައެވެ.

އީސުލްޖުމްހޫރިއްޔާ ވަނީ ވޭޕްކުރުމަށް ބޭނުންކުރާ ތަކެތި ރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާކުރުމަށް ނިންމަވާފައެވެ. އަދި ދުންފަތުން އުފައްދާފައިވާ ތަކެތި ގަނެވިއްކޭނެ އެންމެ ހަގު އުމުރު 21 އަހަރަށް ކަނޑައެޅުމަށްވެސް ނިންމަވާފައިވެއެވެ.

ރައްޔިތުންގެ މަޖިލިސް