މަޖިލީހުގެ ކޮމިއުނިކޭޝަންސް ޑިރެކްޓަރު ވަޒީފާއިން ވަކިކޮށްފި

ރައްޔިތުންގެ މަޖިލީހުގެ އިދާރާގެ ކޮމިއުނިކޭޝަންސް ޑިރެކްޓަރުގެ މަޤާމުގައި ހުންނެވި ހަސަން ޒިޔާއު ކުއްލި ގޮތަކަށް އެ މަޤާމުން ވަކިކޮށްފިއެވެ.

މިކަން ހާމަކުރައްވާފައި ވަނީ ޒިޔާއު އަމިއްލައަށް، 2019 ވަނަ އަހަރު މީޑިއާއަށް މަޖިލީހުގެ މެސެޖުތައް ފޯރުކޮށްދިނުމަށް އުފެއްދި ވަޓްސްއެޕް ގްރޫޕަށް މިރޭ ފޮނުއްވި މެސެޖެއްގައެވެ.

ޒިޔާއު ވިދާޅުވި ގޮތުގައި، އޭނާ ވަޒީފާއިން ވަކިކޮށްފައިވަނީ މިއަދުއެވެ. އަދި އެއީ ސިޔާސީ މަޤާމެއް ނޫން ނަމަވެސް، ޕާލިމެންޓަރީ ސަރވިސް ގަވާއިދާ ޚިލާފަށް ކަމަށް އޭނާ ތުހުމަތުކުރެއްވިއެވެ. މީގެއިތުރުން، މި ނިންމުމުގެ ފަހަތުގައި ތިއްބެވި މަޖިލީހުގެ އިދާރާގެ ބައެއް އިސްވެރިންގެ ނަންތައް ވެސް ޒިޔާއު ފާހަގަކުރެއްވިއެވެ.

"ޕާލިމެންޓަރީ ސަރވިސް ގަވާއިދާ ޚިލާފަށް، އެ ގަވާއިދުގައި ބަޔާންކުރާ އިޖުރާއަތުތަކާ ދެކޮޅަށް، ނޯޓިސް ދިނުމަކާ ނުލައި އަވަސްއަރުވާލައިގެން ވަޒީފާއިން ވަކިކުރުމުގެ މަޤްޞަދުގައި، ޕާލިމެންޓަރީ ސަރވިސް ގަވާއިދުގެ ކޯޑް އޮފް ކޮންޑަކްޓާ ޚިލާފުވި ކަމަށް ބުނެ ވަކިކޮށްފައިވަނީ" ޒިޔާއު ވިދާޅުވިއެވެ. އޭނާ އިތުރަށް ވިދާޅުވީ މިއީ މަޖިލީހުގެ އިދާރާގެ އިސްވެރިންގެ ޒާތީ ހަސަދަވެރިކަމުގެ ސަބަބުން ކަމަށެވެ.

ޒިޔާއު ވިދާޅުވި ގޮތުގައި، މި މައްސަލަ ވަޒީފާއާބެހޭ ޓްރައިބިއުނަލްއަށާއި ހިއުމަން ރައިޓްސް ކޮމިޝަނަށް އަދި މަޖިލީހުގެ އާންމު ކޮމިޓީއަށް ހުށަހަޅުއްވާނެއެވެ. މިކަމާ ގުޅޭގޮތުން މަޖިލީހުގެ އިދާރާއިން އަދި އެއްވެސް ބަޔާނެއް ނެރެފައެއް ނުވެއެވެ.