މެސީގެ އިންޓާ މިއާމީއަށް ކްލަބް ވޯލްޑް ކަޕްގެ ފަހު ޖާގަ

އަންނަ އަހަރު އެމެރިކާގައި ބޭއްވުމަށް ހަމަޖެހިފައިވާ ފީފާ ކްލަބް ވޯލްޑް ކަޕްގެ އެންމެ ފަހު ޖާގަ ލިއޮނެލް މެސީގެ އިންޓާ މިއާމީއަށް ލިބިއްޖެއެވެ.

މި މުބާރާތުގައި ޖުމުލަ 32 ޓީމު ވާދަކުރާއިރު، 2025 ވަނަ އަހަރުގެ ޖޫން 15 އިން ޖުލައި 3 އަށް ކުޅުން  ކުރިއަށްދާނެއެވެ. އިންޓާ މިއާމީއަށް މި ފުރުސަތު ލިބުނީ އެމްއެލްއެސް ސަޕޯޓާސް ޝީލްޑް ކާމިޔާބުކޮށް، ރެގިއުލާ ސީޒަންގައި އާ ރިކޯޑެއް ގާއިމުކުރުމުންނެވެ.

މި ޓީމުގައި މެސީގެ އިތުރުން ސާޖިއޯ ބުސްކެޓްސް، ޖޯޑީ އަލްބާ އަދި ލުއިސް ސުވަރޭޒް ފަދަ ތަޖުރިބާކާރު ކުޅުންތެރިން ހިމެނޭއިރު، އެމެރިކާގެ މޭޖަރ ލީގު ސޮކަރގައި އިންޓާ މިއާމީ ވަނީ ފާހަގަކޮށްލެވޭ ކާމިޔާބީތަކެއް ހޯދާފައެވެ. ފީފާގެ ރައީސް ޖިއާނީ އިންފަންޓީނޯ ވިދާޅުވެފައިވަނީ އިންޓާ މިއާމީން އެމެރިކާގައި އެއް ފެންވަރެއްގައި ރަނގަޅު ކުޅުމެއް މުޅި ސީޒަންގައި ދެއްކިދާނެ ޓީމެއްކަން ސާބިތުކޮށްދީފައިވާ ކަމަށެވެ.

މުބާރާތުގެ މެޗުތައް އެމެރިކާގެ އަށް ދަނޑެއްގައި ކުޅޭއިރު، ފައިނަލް މެޗު ކުޅޭނީ ނިއު ޖާޒީގެ މެޓްލައިފް ސްޓޭޑިއަމްގައެވެ. އިންޓާ މިއާމީގެ ހޯމް ގްރައުންޑް ކަމަށްވާ ހާޑް ރޮކް ސްޓޭޑިއަމްގައިވެސް މެޗުތަކެއް ކުޅޭނެއެވެ. މުބާރާތުގައި ވާދަކުރާ ޓީމުތަކުގެ އަދަދު 32 އަށް ފީފާއިން އިތުރުކުރުމާ ގުޅިގެން ބައެއް ފަރާތްތަކުން ހިތްހަމަނުޖެހުން ފާޅުކުރަމުންދާއިރު، މި ހިތްހަމަނުޖެހުން އަންނަނީ މައިގަނޑު ގޮތެއްގައި ޔޫރަޕުންނެވެ.

ކްލަބް ވޯލްޑް ކަޕްގެ ގުރުއަތުލުން އޮންނާނީ މިއަހަރުގެ ޑިސެންބަރު މަހުއެވެ. މުބާރާތުގައި ބައިވެރިވާ 32 ޓީމުގެ ތެރެއިން 31 ޓީމު މިހާރު ވަނީ ހޮވިފައެވެ. އެންމެ ފަހު ޖާގަ ލިބޭނީ މި އަހަރުގެ ކޮޕާ ލިބެޓަޑޯރެސް ކަޕް ކާމިޔާބުކުރާ ޓީމަކަށެވެ. މިހާތަނަށް ޖާގަ ހޯދާފައިވާ ޓީމުތަކުގެ ތެރޭގައި މެންޗެސްޓަރ ސިޓީ، ޗެލްސީ، ރެއަލް މެޑްރިޑް، ބަޔަން މިއުނިކް، ޕެރިސް ސެއިންޓް ޖަރމޭން، އިންޓަރ މިލާން، ޕޯޓޯ އަދި ބެންފީކާ ފަދަ ނަން މަޝްހޫރު ކްލަބްތައް ހިމެނެއެވެ.