މާލޭގެ ބުޅަލުގެ މައްސަލަ ކުރިން ހައްލުނުވީ އެމްޑީޕީ ސަރުކާރުން ބިން ނުދިނުމުން: ނަރީސް

މާލެއަށް ކުރިމަތިވެފައިވާ ބުޅަލުގެ މައްސަލަ ކުރިން ހައްލުނުކުރެވުނީ އެމްޑީޕީގެ ވެރިކަމުގައި ބިން ހަމަޖައްސައިނުދިނުމުން ކަމަށް މާލެ ސިޓީގެ މޭޔަރުގެ ނައިބު އަހުމަދު ނަރީޝް ވިދާޅުވެއްޖެއެވެ.

ނަރީޝް ފާހަގަކުރެއްވި ގޮތުގައި މި މައްސަލައަށް ދާއިމީ ހައްލެއް ގެނައުމަށް މަސައްކަތް ފެށުނީ މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާލެ ސިޓީ މޭޔަރުގެ މަޤާމުގައި ހުންނެވިއިރުއެވެ.

މިހާރު ހުޅުމާލޭގައި ކެޓް ޝެލްޓަރެއް އެޅުމުގެ މަސައްކަތް ދަނީ ކުރިއަށެވެ. މާލޭގެ މޭޔަރު އާދަމް އާޒިމް ވިދާޅުވެފައިވަނީ އަންނަ މަހުގެ ތެރޭގައި މި ޝެލްޓަރަށް ބުޅާތައް ގެންދެވޭނެ ކަމަށެވެ. މި ފެސިލިޓީގައި އެކި ވައްތަރުގެ ޕެޓް ކެއަރ ޚިދުމަތްތައްވެސް ދޭން ރޭވިފައިވާ ކަމަށް މާލެ ސިޓީ ކައުންސިލުން ބުނެފައިވެއެވެ.

މި މަޝްރޫޢުގެ ދަށުން ހުޅުމާލޭގެ ދެވަނަ ފިޔަވަހިން 5,000 އަކަފޫޓުގެ ބިމެއް އެޗްޑީސީން މާލެ ސިޓީ ކައުންސިލަށް ދޫކޮށްފައިވެއެވެ. ހުޅުމާލެ ފަރުކޮޅުފުށި ސަރަހައްދުގައި ބިނާކުރެވޭ މި ފެސިލިޓީގެ މަސައްކަތް ފެށިފައިވަނީ މިއަހަރުގެ މާރިޗު މަހުގެ ތެރޭގައެވެ. މި މަޝްރޫޢަކީ މާލޭގައި އުޅޭ ބުޅާތަކުގެ އަދަދު ކޮންޓްރޯލްކުރުމަށާއި، އެ ޖަނަވާރުތަކަށް އެކަށީގެންވާ ފަރުވާ ދިނުމަށް އަމާޒުކޮށްގެން ކުރިއަށްގެންދާ މަސައްކަތެކެވެ.

ރައީސް ޑރ. މުއިއްޒު ވެރިކަމާ ހަވާލުވެވަޑައިގަތުމަށްފަހު، ގްރޭޓަރ މާލެ ސަރަހައްދުގައި ބުޅާ ގިނަވުމުގެ މައްސަލަ ހައްލުކުރުމަށް ޚާއްޞަ އިސްކަމެއް ދެއްވާފައިވެއެވެ. މިގޮތުން، މިއަހަރުގެ ޖަނަވަރީ މަހު އިޢުލާންކުރެއްވި ގޮތުގައި ކ. ފަރުކޮޅުފުށީގައި ޕެޓް ކެއަރ ފެސިލިޓީއެއް ޤާއިމުކުރުމަށް ވަނީ ނިންމަވާފައެވެ. މި މަސައްކަތަކީ ކުރީގެ ސަރުކާރުތަކުން ހަމައެކަނި ވާހަކަދެއްކި ކަމެއްގެ ގޮތުގައި ބެލެވުނު ނަމަވެސް، މިހާރުގެ ސަރުކާރުން މިކަމަށް ޢަމަލީ ފިޔަވަޅުތަކެއް އަޅަމުންދާކަން ފާހަގަކުރެވެއެވެ.