ސަރުކާރުން 4.27 ބިލިއަން ރުފިޔާގެ ޓީބިލް ވިއްކަން ހުޅުވާލައިފި

 ދައުލަތުގެ ޚަރަދުތައް ފޫބެއްދުމަށްޓަކައި، 4.27 ބިލިއަން ރުފިޔާގެ ޓީބިލް ވިއްކަން ފިނޭންސް މިނިސްޓްރީން ހުޅުވާލައިފިއެވެ.

މިފަހަރު ވިއްކުމަށް ހުޅުވާލާފައިވަނީ އެއް މަހާއި، ތިން މަހާއި، ހަ މަހާއި، އެއް އަހަރުތެރޭ އަނބުރާ ދައްކަން ޖެހޭ ހަތަރު ބާވަތެއްގެ ޓީބިލެކެވެ.

ފިނޭންސް މިނިސްޓްރީގެ ތަފާސްހިސާބުތަކުން ދައްކާގޮތުގައި، މިހާރުވެސް ސަރުކާރުން ޓީބިލު ވިއްކުމަށްފަހު ނުދައްކާ 85.3 ބިލިއަން ރުފިޔާ އެބައޮތެވެ. މިއާއެކު ދައުލަތުގެ ދަރަނި އިތުރަށް ބޮޑުވެގެންދާނެއެވެ. ނަމަވެސް، ސަރުކާރުން ބުނެފައިވަނީ ދަރަނީގެ ގޮތުގައި ދައްކަން ޖެހޭ ފައިސާ އެކަމަށް އިސްކަންދީގެން ދައްކަމުންދާނެ ކަމަށެވެ.

މިފަހަރު ވިއްކާ ޓީބިލްތަކުގެ ތެރެއިން އެންމެ ކުރު މުއްދަތުގެ ބިލަކީ އެއް މަސްދުވަހުގެ ބިލެވެ. މި ބިލަށް 235 މިލިއަން ރުފިޔާ 3.50 އިންސައްތަ އިންޓަރެސްޓުގައި ވިއްކާނެއެވެ. އެންމެ ދިގު މުއްދަތުގެ ބިލަކީ އެއް އަހަރުގެ ބިލެވެ. މި ބިލަށް 837.70 މިލިއަން ރުފިޔާ 4.60 އިންސައްތަ އިންޓަރެސްޓުގައި ވިއްކާނެއެވެ.

ދައުލަތުގެ ދަރަނި ބޮޑުވެ، ރިޒާވް ވެސް ދަށްވެފައިވާ މި ދަނޑިވަޅުގައި، ސަރުކާރުން އަންނަނީ އާމްދަނީ އިތުރު ކުރުމަށާއި ޚަރަދުތައް ކުޑަކުރުމަށް ފިޔަވަޅުތައް އަޅަމުންނެވެ. މީގެ ތެރޭގައި ސިޔާސީ މުވައްޒަފުން މަދުކުރުމާއި، ބައެއް ޓެކްސްތައް ބޮޑުކުރުން ހިމެނެއެވެ.

ޓީބިލްތައް އާންމުގޮތެއްގައި ގަންނަނީ ރާއްޖޭގެ ބައެއް ބޭންކްތަކުންނާއި، ޕެންޝަން އޮފީހުންނާއި، ސަރުކާރަށް ނިސްބަތްވާ ކުންފުނިތަކުންނެވެ. އަދި ބައެއް އަމިއްލަ ކުންފުނިތަކުން ވެސް ސަރުކާރުގެ ޓީބިލްގައި އިންވެސްޓްކުރެއެވެ. މިއީ މިއަހަރު ތެރޭގައި ސަރުކާރުން ޓީބިލް ވިއްކުމަށް ހުޅުވާލި ފުރަތަމަ ފަހަރެއް ނޫނެވެ. މިދިޔަ އޮގަސްޓު މަހުވެސް 1.9 ބިލިއަން ރުފިޔާގެ ޓީބިލު ވިއްކާފައިވެއެވެ.