އިސްރާއީލުގެ ނިއުކްލިއަރ މަރުކަޒު ފުނޑާލުމަށް އީރާނުން ތައްޔާރުވަނީ

އިސްރާއީލުން އީރާނަށް ދޭނެކަމަށް ބެލެވޭ ހަމަލާތަކުގެ ރައްދުގައި އިސްރާއީލުގެ ނިއުކްލިއަރ މަރުކަޒު ފުނޑާލުމަށް އީރާނުގެ އިންގިލާބީ ލަޝްކަރުން ތައްޔާރުވަމުންދާކަމަށް އީރާނުގެ ކުރީގެ ޖެނެރަލެއް ކަމަށްވާ އިބްރާހީމް ރުސްތުމީ ވިދާޅުވެއްޖެއެވެ.

އީރާނުގެ ނޫސް އެޖެންސީ "އިރްނާ" އަށް ދެއްވި ބަޔާނެއްގައި ރުސްތުމީ ވިދާޅުވީ، އިސްރާއީލުން އީރާނުގެ އެއްވެސް ނިއުކްލިއަރ މަރުކަޒަކަށް ހަމަލާއެއް ދީފިނަމަ، އިސްރާއީލުގެ ދައިމޫނާގައި ހުންނަ އެގައުމުގެ މައި ނިއުކްލިއަރ މަރުކަޒު ފުނޑާލުމަށް އީރާނުން ނިންމާފައިވާ ކަމަށެވެ. މިކަމާ ގުޅޭގޮތުން އީރާނުގެ އެލީޓް ފޯސްއިން ކުރިންވެސް އަދި ދާދި ފަހުންވެސް ތަމްރީންތަކެއް ހަދާފައިވާކަމަށް އޭނާ ހާމަކުރެއްވިއެވެ.

ރުސްތުމީ ވިދާޅުވިގޮތުގައި އިސްރާއީލުގެ މައި ނިއުކްލިއަރ މަރުކަޒަށް އީރާނުން ހަމަލާދޭނެ ކަމަށް ބެލެވެނީ އަޑަށްވުރެ 10 ގުނަ ބާރަށް ދަތުރުކުރާ ހައިޕަސޮނިކް މިސައިލުންނެވެ. މިއީ ރާޑަރަށް ނާރާ އަދި ވައިގެ ދިފާއީ އެއްވެސް ނިޒާމަކަށް ވައްޓާނުލެވޭނެ މިސައިލުތަކެކެވެ. މިފަދަ 10 މިސައިލުން އިސްރާއީލުގެ ނިއުކްލިއަރ މަރުކަޒު އެއްކޮށް ބިމާ ހަމަކޮށްލެވޭނެކަމުގެ ޔަގީންކަން އީރާނަށް އޮތްކަމަށްވެސް އޭނާ ފާހަގަކުރެއްވިއެވެ.

އިތުރަށް އޭނާ ވިދާޅުވިގޮތުގައި، އީރާނަށް ރައްދު ހަމަލާދޭއިރު އީރާނުގެ ނިއުކްލިއަރ މަރުކަޒުތަކަށް ހަމަލާ ނުދިނުމަށް އެމެރިކާއިން އިސްރާއީލަށް އަންގާފައިވަނީ މިކަމުގެ ސަބަބުން ސަރަހައްދީ ހަނގުރާމައެއް ފެށި، ހުރުމުޒް ކަނޑުއޮޅި ބަންދުވެ، ދުނިޔޭގެ ތެލުގެ އަގަށް ބޮޑު އަސަރެއް ކޮށްފާނެތީއެވެ.

އިސްރާއީލުގެ ނޫސްތަކުން ރިޕޯޓުކުރާ ގޮތުގައި، އެމެރިކާގެ އެންގުމާއެކު އިސްރާއީލުވަނީ އީރާނުގެ ނިއުކްލިއަރ މަރުކަޒުތަކާއި ތެލުގެ މަރުކަޒުތަކަށް ހަމަލާ ނުދޭން ނިންމާފައެވެ. އެއީ އެފަދަ ހާލަތެއްގައި އިސްރާއީލުގެ އައްސޭރި ފަށުގައިވާ ތެލާއި ގޭހުގެ މަރުކަޒުތަކަށާއި ކަރަންޓު އުފައްދާ މައި ތިން ސްޓޭޝަނަށް އީރާނުން ހަމަލާ ދޭނެކަމަށް ބެލެވޭތީއެވެ.