އިންގްލެންޑް ޓީމުގެ ކޯޗުކަން ގާޑިއޯލާއަށް އޮފާކޮށްފި

ކޯޗު ޕެޕް ގާޑިއޯލާ

މެންޗެސްޓާ ސިޓީގެ ކޯޗު ޕެޕް ގާޑިއޯލާއަށް އިންގްލެންޑް ޓީމުގެ ކޯޗުކަން އޮފާކޮށްފައިވާ ކަމަށް އިނގިރޭސި މީޑިއާ ރިޕޯޓްތައް ބުނެފިއެވެ.

ގާޑިއޯލާ، 53، ސިޓީގެ ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. އޭނާ ވަނީ މިއީ ސިޓީގައި އޭނާގެ ފަހު އަހަރު ކަމަށް މީގެ ކުރިން ބުނެފައެވެ.

އިންގްލެންޑްގެ ކުރީގެ ކޯޗު ގަރެތު ސައުތުގޭޓް މަގާމުން އިސްތިއުފާދިނުމާ ގުޅިގެން، އިނގިރޭސި އެފްއޭ އިން އަންނަނީ އާ ކޯޗަކު ހޯދުމުގެ މަސައްކަތް ކުރަމުންނެވެ. މިގޮތުން ތޯމަސް ޓުޗެލްއާ ވެސް ވާހަކަ ދައްކަމުންދާ ކަމަށް ރިޕޯޓުތައް ބުނެއެވެ.

ގާޑިއޯލާ އަކީ އިނގިރޭސި އެފްއޭ އިން އަބަދުވެސް ޝައުގުވެރިކަން ހުންނަ ކޯޗަކަށް ވާތީ އޭނާއަށް ވެސް އިންގްލެންޑްގެ ކޯޗުގެ މަގާމު ވަނީ އޮފާކޮށްފައެވެ. ގާޑިއޯލާ ވަނީ މީގެ ކުރިން ގައުމީ ޓީމަކަށް ކޯޗުކޮށްދޭން ޝައުގުވެރިވާ ކަމަށް ވެސް ބުނެފައެވެ.

ސިޓީން ވަނީ، އެ ޓީމުގެ ސްޕޯޓިން ޑިރެކްޓަރަކަށް، ހޫގޯ ވިއާނާ ހަމަޖައްސަން ނިންމައިފައެވެ. މިއީ ގާޑިއޯލާގެ މުސްތަގުބަލަށް އަސަރުކުރާނެ ނިންމުމެއް ގޮތުގައި މީޑިއާތަކުން ވަނީ ރިޕޯޓްކޮށްފައެވެ.

އިންގްލެންޑް މެންޗެސްޓަރ ސިޓީ