ރާއްޖޭގައި ވޭޕް މަނާކުރަން ސަރުކާރުން ނިންމައިފި

ވޭޕްކުރުމަކީ ސިއްހަތަށް ގެއްލުންހުރި ނުރައްކާތެރިކަމެއް

ވޭޕްކުރަން ބޭނުންކުރާ އެންމެހާ ތަކެތި ރާއްޖެ އެތެރެކުރުމާއި ބޭނުންކުރުން މަނާކުރަން ސަރުކާރުން ނިންމައިފި ކަމަށް ރައީސް މުހައްމަދު މުއިއްޒު މިއަދު އިޢުލާންކުރައްވައިފިއެވެ.

ރައީސްގެ އެކްސް ޕޯސްޓުގައި ވިދާޅުވެފައިވާ ގޮތުން، ވޭޕްކުރުމަށް ބޭނުންކުރާ ތަކެއްޗާއި އެ ތަކެތީގެ ވަކިވަކި ބައިތައް ރާއްޖެއަށް އެތެރުކުރުން އަންނަ 15 ނޮވެމްބަރުން ފެށިގެން މަނާކުރެވޭނެއެވެ.

މީގެ އިތުރުން، ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭ ބެހުން އަންނަ 15 ޑިސެމްބަރުން ފެށިގެން މަނާކުރެވޭނެއެވެ.

ރައީސް މުއިއްޒު ވިދާޅުވެފައިވަނީ މި ކަންކަން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގަވާފައިވާ ކަމަށެވެ.

ވޭޕް އާއި އީ-ސިނގިރޭޓް ރާއްޖޭގައި އާންމުވެ، އެކަމުގެ ސަބަބުން ޒުވާނުންނާއި އެކި އުމުރުފުރައިގެ މީހުންގެ ސިއްހަތަށް ނޭދެވޭ އަސަރުކޮށް، އެކަމާ ގުޅިފައިވާ ސީރިއަސް ސިއްހީ މައްސަލަތައް ރާއްޖޭގައި ވެސް ވަނީ އިތުރުވާން ފަށާފައެވެ.

މިކަމާ ގުޅިގެން ވޭޕް އާއި އީ-ސިގިރޭޓް ރާއްޖޭގައި މަނާކުރުމަށް އެކި ޖަމްއިއްޔާ ޖަމާއަތްތަކުން ސަރުކާރަށް ދިޔައީ ގޮވާލައި ބާރުއަޅަމުންނެވެ.

ރައީސް ޑރ މުޙައްމަދު މުޢިއްޒު