އެއާޕޯޓް ޓެކްސް އިތުރުކުރުމަށް ސަރުކާރުން މަސައްކަތް ފަށައިފި

ވެލާނާ އިންޓަނޭޝަނަލް އެއާޕޯޓް (ވިއައިއޭ) މެދުވެރިކޮށް ދަތުރުކުރާ ފަރާތްތަކުގެ އަތުން ނަގަމުންދާ ޓެކްސްތައް މަތިކުރުމަށް ސަރުކާރުން ވަނީ ރައްޔިތުންގެ މަޖިލީހަށް ހުށަހަޅާފައެވެ.

މި ބަދަލުތައް ތަންފީޒުކުރަން ހުށަހަޅާފައިވަނީ މި އަހަރުގެ ޑިސެމްބަރު މަހުގެ 1 ވަނަ ދުވަހުން ފެށިގެންނެވެ.

ރައްޔިތުންގެ މަޖިލީހުގެ ޗުއްޓީ ނިމި، މިއަދު ބޭއްވޭ ޖަލްސާއަށް ހުށަހެޅިފައިވާ އިސްލާހުތަކުގެ ދަށުން، އިކޮނޮމީ ކްލާހުން ދަތުރުކުރާ ބިދޭސީންގެ އަތުން ނަގާ ފީ 30 ޑޮލަރުން 50 ޑޮލަރަށް އިތުރުކުރުމަށް ވަނީ ހުށަހަޅާފައެވެ. ނަމަވެސް، އިކޮނޮމީ ކްލާހުން ދަތުރުކުރާ ދިވެހިންގެ އަތުން ނަގާ ފީއަށް ބަދަލެއް ނުގެންނާނެ ކަމަށް ވެއެވެ.

މީގެ އިތުރުން، ބިޒްނަސް ކްލާހުން ދަތުރުކުރާ ފަރާތްތަކުގެ އަތުން ނަގާ ފީ 60 ޑޮލަރުން 120 ޑޮލަރަށް، އަދި ފަސްޓް ކްލާހުން ދަތުރުކުރާ ފަރާތްތަކުގެ އަތުން ނަގާ ފީ 90 ޑޮލަރުން 240 ޑޮލަރަށް އިތުރުކުރުމަށް ވެސް ވަނީ ހުށަހަޅާފައެވެ. އަދި ޖެޓުގައި ދަތުރުކުރާ ފަރާތްތަކުގެ އަތުން ނަގާ ފީ 120 ޑޮލަރުން 480 ޑޮލަރަށް މަތިކުރުމަށް ވެސް ހުށަހެޅިފައިވެއެވެ.

ސަރުކާރުގެ އަންދާޒާތަކުން ދައްކާ ގޮތުގައި، އެއާޕޯޓް ޓެކްސް އިތުރުކުރުމުގެ ސަބަބުން ދައުލަތަށް 1.6 ބިލިއަން ރުފިޔާގެ އިތުރު އާމްދަނީއެއް ލިބޭނެއެވެ. މި ބަދަލު ގެނައުމުގެ މައިގަނޑު މަޤްޞަދަކީ، ޓެކުހުގެ އާމްދަނީ ޑޮލަރުން ލިބޭތީ، ޤައުމުގެ ބޭރު ފައިސާގެ ރިޒާވުގެ ހާލަތު ރަނގަޅުކުރުމަށް މަގުފަހިކުރުން ކަމަށް ބިލުގައި ބަޔާންކޮށްފައިވެއެވެ.

މި ހުށަހެޅުމާ ގުޅޭގޮތުން މަޖިލީހުގައި މަޝްވަރާކުރެވި ފާސްވެއްޖެނަމަ، ކުރިއަށް އޮތް މަހުގެ ތެރޭގައި މި އައު އަގުތަކަށް ޢަމަލުކުރަން ފެށިދާނެއެވެ.