ދަރުމަވަންތަ ހޮސްޕިޓަލުގައި ޒަމާނީ ހައިބްރިޑް އޮޕަރޭޓިން ތިއޭޓަރު ބޭނުންކުރަން ފަށައިފި

ސަރުކާރުގެ މައި ހޮސްޕިޓަލް، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ބެލުމުގެ ދަށުން ހިންގާ ދަރުމަވަންތަ ހޮސްޕިޓަލުގައި ޒަމާނީ ހައިބްރިޑް އޮޕަރޭޓިން ތިއޭޓަރެއް ބޭނުންކުރަން ފަށައިފިއެވެ.

އައިޖީއެމްއެޗްއިން މިއަދު ދެއްވި މަޢުލޫމާތުގައިވާ ގޮތުން، މި އައު ފެސިލިޓީގައި ކެތު ލެބްވެސް ހިމެނެއެވެ. މި އެޑްވާންސް ފެސިލިޓީގެ ސަބަބުން ނާރުގެ އޮޕަރޭޝަންތަކާއި، ހިތުގެ އޮޕަރޭޝަންތަކުގެ އިތުރުން ބެދިފައި ހުންނަ ލޭ ހޮޅިތައް ރަނގަޅު ކުރުމުގެ ޕްރޮސީޖަރތައް ހެދުމުގެ ޤާބިލުކަން ލިބިގެންދާނެއެވެ.

އައިޖީއެމްއެޗްއިން ފާހަގަކުރެއްވި ގޮތުގައި މިއީ ދުނިޔޭގެ ފެންވަރުގެ ޞިއްޙީ ޚިދުމަތް ރާއްޖެއަށް ލިބިގެންދިއުމުގެ މުހިންމު ފިޔަވަޅެކެވެ.

ދަރުމަވަންތަ ހޮސްޕިޓަލްގެ މަސައްކަތް ނިމި، އެތަނުގެ ބޭނުންކުރަން ފެށީ 2019 ވަނަ އަހަރުގެ އޭޕްރީލް މަހުގެ ތެރޭގައެވެ. މި ހޮސްޕިޓަލުގައި އާދައިގެ ހަތަރު އޮޕަރޭޝަން ތިއޭޓަރުގެ އިތުރުން މި ހައިބްރިޑް ތިއޭޓަރު ގާއިމުކޮށްފައިވެއެވެ.

އާދައިގެ އޮޕަރޭޝަން ތިއޭޓަރުތައް ބޭނުންކުރަން ފެށީ ކޮވިޑް-19 ގެ ބަލިމަޑުކަމުގެ ތެރޭގައި ކަމަށްވާއިރު، މި އައު ހައިބްރިޑް ތިއޭޓަރު ބޭނުންކުރަން ފެށުމާއެކު ރާއްޖޭގެ ޞިއްޙީ ދާއިރާއަށް އިތުރު ކުރިއެރުމެއް ލިބިގެންދާނެ ކަމަށް ބެލެވެއެވެ.