މޫސުން ގޯސްވެ ކަނޑުތައް ގަދަވެ، ކަނޑު ދަތުރުތައް ނުކުރުމަށް ފުލުހުން އެދިއްޖެ

ރާއްޖެއަށް ކުރަމުންދާ ގަދަ ވިއްސާރައާ ގުޅިގެން، ކޮންމެހެން ކުރަންޖެހޭ ދަތުރެއް ނޫނީ ކަނޑު ދަތުރުތައް ނުކުރުމަށް ފުލުހުން އިލްތިމާސްކޮށްފިއެވެ.

މޫސުމާބެހޭ ގައުމީ އިދާރާއިން މަޢުލޫމާތު ދެއްވާފައިވާ ގޮތުގައި، ބައެއް ހިސާބުތަކުގައި ވިލާގަނޑުގައި 55 މޭލަށް ވައި ބާރުވެ، ބޯކޮށް ވާރޭވެސް ވެހުން އެކަށީގެންވެއެވެ. އަދި މިކަމާއި ގުޅިގެން އެ އިދާރާއިން ދަނީ އިންޒާރުތައް ނެރެމުންނެވެ. މިގޮތުން ރ. އަތޮޅުން ފެށިގެން ވ. އަތޮޅާ ހަމައަށް ވަނީ ޔެލޯ އެލާޓް ނެރެފައެވެ.

މޫސުން ގޯސްވުމުގެ ސަބަބުން ދިވެހި ފުލުހުންގެ އިދާރާއިންވެސް މިއަދު ވަނީ ކަނޑު ދަތުރުކުރަން ޖެހިއްޖެ ހާލަތެއްގައިވެސް ރައްކާތެރިކަމުގެ ފިޔަވަޅު އަޅަން އިލްތިމާސްކޮށްފައެވެ. އަދި ކުދި އުޅަނދުތަކުގައި ދަތުރުނުކުރުމަށްވެސް އެދިފައިވެއެވެ.

މި ދުވަސްވަރު މާލެއަށްވެސް ވިއްސާރަ ކުރަމުންދާތީ، ސިނަމާލެ ބްރިޖާއި ހައިވޭއިން ދަތުރުކުރާއިރު ސަމާލުވުމަށް ފުލުހުން ވަނީ އިލްތިމާސްކޮށްފައެވެ. އެގޮތުން ބްރިޖާއި ހައިވޭއިން ދަތުރުކުރާއިރު، ތިމާ އާއި އަނެކުންގެ ސަލާމަތާއި ރައްކާތެރިކަމަށް ބަލައިގެން ދުއްވުމަށް އަންގާފައިވެއެވެ.

ސައިކަލު ދުއްވާއިރު ކުޑަ ނަގައިގެން ނުދިޔުމަށާއި، ފަސޭހައިން ހަލާކުވެ ވަޔާދާ ކޯޓު ބޭނުން ނުކުރުމަށާއި، ހެލްމެޓުވެސް ވަޔާނުދާނެހެން ރަނގަޅަށް އެޅުމަށް ފުލުހުން ވަނީ އިރުޝާދު ދީފައެވެ. އަދި އުޅަނދުގެ ލައިޓުތައް ދިއްލޭތޯ ބަލައި ސަލާމަތާއި ރައްކާތެރިކަން ކަށަވަރު ކުރުމަށްފަހު އުޅަނދު ދުއްވުމަށްވެސް އިލްތިމާސްކޮށްފައިވެއެވެ.

މޫސުމާބެހޭ އިދާރާއިން މަޢުލޫމާތު ދެއްވާފައިވާ ގޮތުގައި، ގަޑިއަކު 28 މޭލާއި 35 މޭލާ ދެމެދުގެ ބާރުމިނުގައި ވައި ޖެހޭނެއެވެ. އަދި ވިލާގަނޑުގައި ގަޑިއަކު 55 މޭލަށް ވައި ބާރުވެ، ކަނޑުތައް ވަރަށް ގަދަވާނެ ކަމަށް އެ އިދާރާއިން ބުނެފައިވެއެވެ.