ކޫއްޑޫ އެއާޕޯޓުގެ ރަންވޭ ހަލާކުވުމުން މޯލްޑިވިއަންގެ ދަތުރުތައް ހުއްޓާލައިފި

ގއ. ކޫއްޑޫ އެއާޕޯޓުގެ ރަންވޭގެ ފެންވަރު ދަށްވެގެން އެ އެއާޕޯޓަށް ދަތުރު ނުކުރުމަށް ގައުމީ އެއާލައިން މޯލްޑިވިއަންއިން ނިންމައިފި އެވެ.

ކޫއްޑޫއަށް ދަތުރު ކުރާ ހަމައެކަނި އެއާލައިން ކަމުގައިވާ މޯލްޑިވިއަންއިން މި ނިންމުން ނިންމައި، އެކަން އަންގަންޖެހޭ ފަރާތްތަކަށް މިހާރު ދަނީ އަންގަމުންނެވެ.

ކޫއްޑޫ އެއާޕޯޓުގެ އިސް އޮފިޝަލަކު ވިދާޅުވި ގޮތުގައި އެންމެ ފަހު ފްލައިޓަކަށް އޮތީ މާދަމާ ހަވީރުގެ ފްލައިޓެވެ. އޭގެ ފަހުން، ރަންވޭގެ ފެންވަރު ދަށްވެގެން އެއާޕޯޓަށް ދަތުރު ނުކުރާނެކަން މޯލްޑިވިއަންއިން ވަނީ އަންގާފައެވެ.

އެ އެއާޕޯޓުގެ މުވައްޒަފުން ބުނާ ގޮތުގައި ކޫއްޑޫ އެއާޕޯޓުގެ ރަންވޭ އެއްވެސް ގޮތަކަށް މަރާމާތުކޮށް މެއިންޓެނަންސް ބަލަހައްޓާފައި ނުވާތާ ހަތް ވަރަކަށް އަހަރު ވެއްޖެ އެވެ. އެހެންކަމުން ރަންވޭ ވަނީ ވަރަށް ބޮޑަށް ހަލާކުވެފައެވެ. މުވައްޒަފުން އިތުރަށް ބުނި ގޮތުގައި ތަކުރާރުކޮށް މިކަން ހައްލުކުރުމަށް އެއާޕޯޓު ހިންގާ ކުންފުނީގައި އެދުމުން ވެސް ހައްލުކޮށްދީފައި ނުވެއެވެ.

"ރަންވޭގެ ހިލަތައް ނެއްޓި، މޯލްޑިވިއަންގެ ދެ ބޯޓެއް މިހާރު ހަލާކުވެއްޖެ. ކޮންމެ ފަހަރަކު ބޯޓެއް ޖައްސަންވީމަ ރަންވޭ ސާފު ކުރަނީ. ހިލަތައް ނަގަން،" މުވައްޒަފަކު ކިޔައިދިނެވެ.

މި ކަމާއި ގުޅިގެން ކުރިއަށް ހުރި ފްލައިޓުތަކުން ޓިކެޓް ގަނެފައިވާ ފަރާތްތަކުގެ ބުކިންތައް އެންމެ ކައިރި އެއާޕޯޓަކުން ފުރާ ފްލައިޓަކަށް ބަދަލު ކުރުމަށް ވަނީ ހަމަޖެހިފައެވެ. މޯލްޑިވިއަންގެ މި ނިންމުމާ ގުޅިގެން ދަތުރުވެރިން ވެސް ދަނީ ކަންބޮޑުވުން ފާޅު ކުރަމުންނެވެ.

މިކަމާ ގުޅިގެން މޯލްޑިވިއަން އަދި ކޫއްޑޫ އެއާޕޯޓުގެ ރަސްމީ ބަހެއް އަދި ނުލިބެ އެވެ. ކޫއްޑޫ އެއާޕޯޓަށް ދަތުރުކުރުން ހުއްޓާލިއިރު، މޯލްޑިވިއަންއިން މިއަދު ވަނީ ޓެކްނިކަލް މައްސަލައަކާ ހުރެ ށ. ފުނަދުއަށް ކުރަމުން އައި ދަތުރުތައް ވެސް މެދުކަނޑާލާފައެވެ.