އިންޑިއާގެ ވިޔަފާރިވެރިޔާ ރަތަން ޓާޓާ 86 އަހަރުގައި ނިޔާވެއްޖެ

އިންޑިއާގެ ޓާޓާ ގްރޫޕްގެ ކުރީގެ ޗެއާމަން އަދި ޓާޓާ ސަންސްގެ ޗެއާމަން، ރަތަން ޓާޓާ އުމުރުފުޅުން 86 އަހަރުގައި އިއްޔެ ނިޔާވެއްޖެއެވެ.

އޭނާ ނިޔާވީ މުމްބާއީގެ ހޮސްޕިޓަލެއްގައި ފަރުވާ ހޯއްދަވަމުން ގެންދަވަނިކޮށެވެ.

އިންޑިއާ ޓީވީ ނޫހުން ރިޕޯޓުކުރި ގޮތުގައި ފާއިތުވި ދުވަސްތަކުގެ ތެރޭ ސިއްހީ ހާލުކޮޅު ވަރަށް ބޮޑަށް ގޯސްވެ ރަތަން ގެންދެވީ މުމްބާއީގެ ހޮސްޕިޓަލެއްގެ އައިސީޔޫގައި ފަރުވާ ހޯއްދަވަމުންނެވެ. ނަމަވެސް ހޯމަ ދުވަހު އޭނާ އެކްސްގައި ކުރެއްވި ޕޯސްޓެއްގައި ވަނީ އޭނާގެ ސިއްހީ ހާލުކޮޅާ ގުޅިގެން ދެކެވެމުން އަންނަ ވާހަކަތައް އެނގިލައްވާކަމަށް ވިދާޅުވެފައެވެ.

ރަތަން ޓާޓާއަކީ 1991 ވަނަ އަހަރު އޮޓޯސް ޓު ސްޓީލް ކޮންގްލޯމެރޭޓްގެ ޗެއާމަންކަން ކުރެއްވި ބޭފުޅެކެވެ. އަދި މީގެ ސަތޭކަ އަހަރަށް ވުރެ ގިނަ ދުވަސް ކުރިން އޭނާގެ މުނިކާފަ އުފެއްދެވި ޓާޓާ ގްރޫޕް 2012 ވަނަ އަހަރާ ހަމައަށް ހިންގެވިއެވެ.

މީގެ އިތުރުން ރަތަން ޓާޓާއަކީ 1996 ވަނަ އަހަރު އުފެއްދި ޓެލެކޮމިއުނިކޭޝަން ކުންފުނި، ޓާޓާ ޓެލެސާވިސަސްގެ ފައުންޑަރެވެ. އަދި އެއަށްފަހު އައިޓީ ކުންފުންޏެއްކަމަށްވާ، ޓާޓާ ކޮންސަލްޓެންސީ ސާވިސަސްގެ ހިންގުމާ 2004 ވަނަ އަހަރު ހަވާލުވެވަޑައިގެންނެވިއެވެ.

މަގާމުން ވަކިވެވަޑައިގަތުމުން، އޭނާއަށްވަނީ ޓާޓާ ސަންސް، ޓާޓާ އިންޑަސްޓްރީސް، ޓާޓާ މޮޓޯސް، ޓާޓާ ސްޓީލް އަދި ޓާޓާ ކެމިކަލްސްގެ ޗެއާމަން އެމެރިޓަސްގެ މަގާމު ދީފައެވެ.

ރަތަން ނިޔާވުމާއެކު އިންޑިއާގެ އިސްވެރިންނާއި ވިޔަފާރިވެރިން ހިމެނޭހެން އެކި ބޭފުޅުންގެ ތައުޒިޔާގެ އެކި މެސެޖުތައް ސޯޝަލް މީޑިއާގައި އަންނަނީ ހިއްސާކުރައްވަމުންނެވެ.