ރައީސް މުއިއްޒަށް މަރުގެ އިންޒާރު ދިން މީހާ ރާއްޖެ އައި ތަނުން ހައްޔަރުކޮށްފި
ހައްޔަރުކުރި އަބްދުﷲ މިޔާދު، ގ. ސަންސަންގެއާގެ/މާލެ. /ފޮޓޯ:ފުލުހުން
ރައީސް މުހައްމަދު މުއިއްޒާއި ދައުލަތުގެ އެކި ވެރިން އަވަހާރަކޮށްލާނެ ކަމުގެ އިންޒާރު ސޯޝަލް މީޑިއާގައި ދިން މައްސަލާގައި ތުހުމަތު ކުރެވޭ މީހާ ރޭ ރާއްޖެ އައި ތަނުން ހައްޔަރުކޮށްފިއެވެ. ފުލުހުން މައުލޫމާތު ދިން ގޮތުގައި ހައްޔަރުކުރެވުނީ އަބްދުﷲ މިޔާދު (40 އަހަރު، ގ. ސަންސަންގެއާގެ/މާލެ) އެވެ.
މި މައްސަލައިގައި އިންޒާރު ދީފައިވަނީ މިދިޔަ މަހުގެ 25 ވަނަ ދުވަހުގެ ރޭ ރައީސް މުއިއްޒުގެ ސޯޝަލް މީޑިއާ ޕޭޖުން ގެނެސްދިން ލައިވް ސްޓްރީމްއަކަށެވެ. އެ ލައިވްގައި ދައްކަމުން ދިޔައީ އދ.ގެ އާންމު މަޖިލީހުގެ ހަވާސާގައި ރައީސް މުއިއްޒު ދެއްވި ތަގުރީރެވެ. މި އިންޒާރު ދީފައިވަނީ 'އަބްލޯ މައިދު ޔޫސެފް' ގެ ނަމުގައި ހަރަކާތްތެރިވި އެކައުންޓަކުންނެވެ.
ފުލުހުން ބުނި ގޮތުގައި މިޔާދު ހައްޔަރުކޮށްފައިވަނީ ރައީސް މުއިއްޒާއި ދައުލަތުގެ އެކި ފެންވަރުގެ ވެރިންނަށް ނިސްބަތްކޮށް "މަރާލާނެ" ކަމަށް ބުނެ އިންޒާރު ދިނުމުގެ އިތުރުން އެހެން މީހުންނަށް ވެސް މަރުގެ އިންޒާރު ދީފައިވާތީއެވެ. އަދި އެ މީހުންނަށް އެހެން ގޮތް ގޮތުން ވެސް ގެއްލުން ދޭނެ ކަމަށް ބުނެ އިންޒާރު ދީފައިވާ ކަމަށާއި، އެއް ޖިންސުން ގުޅުން ހިންގުމަށް ހިތްވަރު ދޭ ގޮތަށް ވެސް ޕޯސްޓުތައް ކޮށްފައިވާ ކަމަށް ފުލުހުން ބުންޏެވެ.
ފުލުހުން އިތުރަށް ބުނި ގޮތުގައި މިޔާދު ހައްޔަރުކޮށްފައި ވަނީ ރާއްޖޭން ބޭރުގައި ހުރެފައި ރޭގެ ވަގުތެއްގައި ރާއްޖެ އައުމުންނެވެ. މި މައްސަލަ މިހާރު ވަނީ ތަހުގީގުގެ މަރުހަލާގައެވެ.
ކޮމެންޓް