އިންޑިއާގެ ވިޔަފާރީގެ މައި މަރުކަޒު މުމްބާއީއަށް ރައީސް މުއިއްޒު ވަޑައިގެންފި

ރައީސް މުހައްމަދު މުއިއްޒު އިންޑިއާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން މިއަދު އެ ގައުމުގެ ވިޔަފާރީގެ މައި މަރުކަޒު ކަމަށްވާ މުމްބާއީއަށް ވަޑައިގެންފި އެވެ.

މުމްބާއީގައި ރައީސް މުއިއްޒު ދެ ހަރަކާތެއްގައި ބައިވެރިވެ ވަޑައިގަންނަވާނެއެވެ. އެއީ ރާއްޖޭގައި ހުރި އިންވެސްޓުމެންޓުގެ ފުރުސަތުތަކާ ބެހޭ މައުލޫމާތު ހިއްސާކޮށް، ވިޔަފާރީގެ ރޮނގުން ދެ ގައުމުގެ ގުޅުން އިތުރަށް ބަދަހި ކުރުމަށް ބާއްވާ ބިޒްނަސް ފޯރަމާއި، ރާއްޖޭގެ ފަތުރުވެރިކަން އިޝްތިހާރު ކުރުމަށް އިންޑިއާގެ ފިލްމީ ތަރިންނާއި އިންފުލުއެންސަރުންނާ އެކު ބާއްވާ ހަރަކާތެކެވެ.

ރައީސް މުއިއްޒުގެ މި ދަތުރުފުޅަކީ އިންޑިއާގެ ރައީސް ދުރޫޕަދީ މުރުމޫގެ ދައުވަތަކަށް ކުރައްވާ ފަސް ދުވަހުގެ ދަތުރުފުޅެކެވެ. މި ދަތުރުފުޅު ފެއްޓެވީ އާދިއްތަ ދުވަހުއެވެ.

ދަތުރުފުޅުގެ ފުރަތަމަ ދެ ދުވަހު ވެރިރަށް ނިއު ދިއްލީގައި އިންޑިއާ-ރާއްޖެ މަތީ ފަންތީގެ މަޝްވަރާތައް ކުރިއަށް ގެންދެވުނެވެ. މީގެ އިތުރުން، އެއްބަސްވުންތައް ބަދަލުކޮށް ގުޅުން ބަދަހިކުރުމާ ގުޅޭ މަޝްވަރާތައް ކުރެއްވިއެވެ.

ރޭ ނިއު ދިއްލީގައި ބޭއްވި ބިޒްނަސް ފޯރަމްގައި ވާހަކަފުޅު ދައްކަވަމުން ރައީސް ވަނީ، ޑިޖިޓަލް އިގްތިސޯދާ ގުޅޭ ދާއިރާތަކުން އިންވެސްޓްކުރުމަށް ރާއްޖެއަކީ ފަހި މާހައުލެއް އޮތް ތަނެއް ކަމަށާއި އެ ދާއިރާ ތަރައްގީ ކުރުމަށް އިންޑިއާގެ އެހީ ބޭނުންވާ ކަމަށް ވިދާޅުވެފައެވެ.

އިންޑިއާގެ ރައީސް ދެއްވި ރަސްމީ ޖާފަތުގައި ވާހަކަފުޅު ދައްކަވަމުން ރައީސް ވަނީ އިންޑިއާ އަކީ ރާއްޖޭގެ ފަތުރުވެރިކަމުގެ މުހިއްމު މާކެޓެއްކަން ފާހަގަކުރައްވައި އިންޑިއާ ފަތުރުވެރިން ރާއްޖެ އައުމަށް ދައުވަތު ދެއްވާފައެވެ.

މި ދަތުރުފުޅުގައި އެންމެ ފަހު މަންޒިލެއްގެ ގޮތުން ރައީސް ވަޑައިގަންނަވާނީ ބެންގަލޫރަށެވެ. ބެންގަލޫރުގައި ވެސް ބިޒްނަސް ފޯރަމެއް ބޭއްވުމަށް ވަނީ ހަމަޖެހިފައެވެ.