ރައީސް މުއިއްޒު އިންޑިއާގެ ވެރިކަންކުރާ ޕާޓީގެ ރައީސާ ބައްދަލުކުރައްވައިފި

ރައީސް ޑރ. މުއިއްޒު ބީޖޭޕީގެ ރައީސްއާ ބައްދަލު ކުރައްވަނީ./ ފޮޓޯ: ރައީސް އޮފީސް

ރައީސް ޑރ. މުހައްމަދު މުއިއްޒު، އިންޑިއާގެ ވެރިކަން ކުރާ ބާރަތިޔާ ޖަނާތާ ޕާޓީ (ބީޖޭޕީ) ގެ ރައީސް އަދި އިންޑިއާގެ ޔޫނިއަން ހެލްތު މިނިސްޓަރު ޖަގަތު ޕްރަކާޝް ނައްޑާއާ އިއްޔެ ބައްދަލުކުރައްވައިފިއެވެ.

މި ބައްދަލުވުމުގައި ދެ ގައުމުގެ ގުޅުން އިތުރަށް ބަދަހިކުރުމާއި ދެ ފަރާތުގެ އެއްގޮތް ވިސްނުންތަކާ ގުޅޭ ގޮތުން މަޝްވަރާކުރެވުނެވެ.

ބައްދަލުވުމުގައި ސިއްޙީ ދާއިރާގައި އެއްބާރުލުން އިތުރުކުރުމަށް ޚާއްޞަ ސަމާލުކަމެއް ދެވުނެވެ. މީގެ ތެރޭގައި ޚާއްޞަ ޑޮކްޓަރުންނާއި ނަރުހުން ތަމްރީންކުރުމާއި، ސިއްޙީ ދާއިރާގެ ބިނާކޮށް ތަރައްޤީކުރުމާއި، ޑިޖިޓަލައިޒްކުރުން ހިމެނެއެވެ.

ރައީސް މުއިއްޒުގެ މި ދަތުރުފުޅުގައި އިއްޔެ އިންޑިއާގެ ބޮޑުވަޒީރު ނަރެންދްރަ މޯދީއާއެކު ރަސްމީ މަޝްވަރާތައް ކުރައްވައި، ރާއްޖެއާއި އިންޑިއާއާ ދެމެދު މުހިންމު ފަސް އެއްބަސްވުމެއްގައި ސޮއިކުރެވުނެވެ. އަދި އައްޑޫ ސިޓީގައި އިންޑިއާގެ ކޮންސިއުލޭޓެއް އަދި ބެންގަލޫރުގައި ރާއްޖޭގެ ކޮންސިއުލޭޓެއް ގާއިމުކުރުމާ ގުޅޭގޮތުން ވެސް މަޝްވަރާކުރެވުނެވެ.

ރައީސް މުއިއްޒުގެ މި ދަތުރުފުޅުގައި އިންޑިއާގެ ވެރިރަށް ނިއުދިއްލީގެ އިތުރުން، މުމްބާއީއަށާއި ބެންގަލޫރަށްވެސް ޒިޔާރަތްކުރެއްވުމަށް ވަނީ ހަމަޖެހިފައެވެ. މި ދަތުރުފުޅަކީ ދެ ގައުމުގެ ދެމެދުގައި އޮތް ގުޅުން އިތުރަށް ހަރުދަނާކޮށް، އެކި ދާއިރާތަކުން އެއްބާރުލުން އިތުރުކުރުމަށް މަގުފަހިކުރާނެ ދަތުރުފުޅެއް ކަމަށް ބެލެވެއެވެ.

ރާއްޖެ އިންޑިޔާ ރައީސް ޑރ މުޙައްމަދު މުޢިއްޒު