ޕީއެސްޖީ އަށް ލީގުގެ އެއްވަނަ ގެއްލުނު ނަމަވެސް އެންރީކޭ އުންމީދުގައި

ފްރެންޗް ލީގުގައި ރޭ ނީސްއާ 1-1 އިން އެއްވަރުވެ، ޕީއެސްޖީ އަށް ލީގުގެ އެއް ވަނަ ގެއްލުނު ނަމަވެސް ކަންބޮޑުނުވާ ސަބަބަކީ އެ ޓީމަށް ލީގުގައި ކޮންޓްރޯލް ނެގުމުގެ ފުރުސަތު އޮތުން ކަމަށް ޕީއެސްޖީގެ ކޯޗު ލުއިސް އެންރީކޭ ބުނެފިއެވެ.

ޕީއެސްޖީ ލީގުގެ ދެ ވަނަ އަށް ވެއްޓުނީ ލީގުގެ އެއް ވަނައިގައި އޮތް މޮނާކޯ އަށް ވުރެ ދެ ޕޮއިންޓް ފަހަތަށެވެ. ނަމަވެސް އެންރީކޭ ބުނީ މިއީ ސީޒަނުގެ ކުރީކޮޅު ކަމަށާއި، އަދިވެސް ކަންކަން ކޮންޓްރޯލްގައި އޮތް ކަމަށެވެ.

"މިއީ ސީޒަނެއްގެ ކުރީކޮޅު، އަހަންނަށް ވަރަށް އުންމީދީ ފެށުމެއް މިއީ، މެޗަކުން ބަލިނުވެ މި އޮތީ. އަދިވެސް އަތުގައި ކޮންޓްރޯލް މި އޮތީ. އެހެންވީމަ އަހަރެން ދެކޭގޮތުގައި އަދި ކަންކަން މި ދަނީ ރަނގަޅަށް،" އެންރީކޭ ބުންޏެވެ.

އެންރީކޭ ފާހަގަކުރި ގޮތުގައި ފެށުން ރަނގަޅު ނަމަވެސް ޓީމުން ހަދަމުން އަންނަ ގޯސްތައް ރަނގަޅުކުރަން ޖެހެއެވެ. އޭގެ ތެރޭގައި ފަސޭހައިން ކަންކަން ކުރެވެން އޮއްވައި، އުނދަގޫ ޕާސްތަކެއް ޖަހައިގެން އެޓޭކްކުރަން އުޅުން ހިމެނެއެވެ.

"ވަނަތައް ހޮވަނީ ސީޒަން ނިމުނީމަ، އޮތީ ކޮން ހިސާބެއްގައިތޯ ބަލާނީ ވެސް ސީޒަން ނިމުނީމަ. މިހާރު އެންމެ މުހިންމު ކަމަކީ، ހުރިހާ ތަށްޓަކަށް ވާދަކުރެވޭ ލެވަލެއްގައި ޓީމު ބޭއްވުން،" އެންރީކޭ ނިންމާލަމުން ބުންޏެވެ.