ރައީސް މުއިއްޒު އިންޑިއާގެ ރައީސާ ބައްދަލުކުރައްވައި ގުޅުން ބަދަހިކުރުމަށް މަޝަވަރާކުރައްވައިފި
ރައީސް ޑރ.މުހައްމަދު މުއިއްޒު އިންޑިއާގެ ރައީސާއި ބައްދަލުކުރެއްވުން
ރައީސް ޑރ. މުހައްމަދު މުއިއްޒު އިންޑިއާގެ ރައީސް ދުރޫޕަދީ މުރުމޫއާ ރޭ ބައްދަލުކުރައްވާ ދެ ގައުމުގެ ދެމެދުގައި އޮތް ގާތް ގުޅުމާއި އެކުވެރިކަން އިތުރަށް ބަދަހިކުރުމާ ގުޅޭ ގޮތުން މަޝްވަރާކުރެއްވިއެވެ.
މި ބައްދަލުވުން ބޭއްވިފައި ވަނީ އިންޑިއާގެ ރިޔާސީ ގަނޑުވަރު، ރާސްތުރަޕަތީ ބަވަންގައެވެ.
އިންޑިއާގެ ރައީސް ވަނީ ރާއްޖެއަކީ އެ ގައުމުގެ އަސާސީ ބައިވެރިއެއްގެ ގޮތުގައި ސިފަކުރައްވާފައެވެ. އަދި އިންޑިއާ އިން ގެންގުޅޭ "ނޭބަހުޑް ފަސްޓް" ސިޔާސަތުގައްޔާއި "ސާގަރް" ތަސައްވުރުގައި ރާއްޖެއަކީ މުހިންމު ބައިވެރިއެއް ކަމަށް ވިދާޅުވިއެވެ.
ރައީސް މުއިއްޒު ވަނީ އިންޑިއާ އާއި ރާއްޖެއާ ދެމެދު އޮތް ޒަމާންވީ ގުޅުން އިތުރަށް ހަރުދަނާ ކުރުމަށް ދެ ގައުމަށް ފައިދާ ހުރި މަސައްކަތްތަކެއް ކުރައްވާނެ ކަމުގެ ޔަގީންކަން ދެއްވާފައެވެ. އަދި ތައުލީމާއި މީހުން ބިނާކުރުމާއި ޓޫރިޒަމް އަދި ސިއްހީ ދާއިރާ ހިމެނޭ ގޮތަށް ގިނަ ދާއިރާތަކުން ތަރައްގީ އަށް ކުރާ މަސައްކަތްތަކުގައި އިންޑިއާ އިން އަދާކުރާ ދައުރުގެ މައްޗަށް އަލިއަޅުއްވައިލެއްވިއެވެ.
މި ބައްދަލުވުމުގައި ދެ ގައުމުގެ ގުޅުން އިތުރަށް ހަރުދަނާކޮށް، މި ދަތުރުފުޅުގައި ފެށި މުއާމަލާތްތައް އެދެވޭ ގޮތެއްގައި ކުރިއަށް ގެންދިއުމަށް ދެ ރައީސުން އެއްބަސްވެވަޑައިގެންނެވިއެވެ.
ރައީސް މުއިއްޒުގެ މި ދަތުރުފުޅަކީ އިންޑިއާ-ރާއްޖެ ގުޅުން އިތުރަށް ބަދަހިކޮށް، ދެ ގައުމުގެ ތަރައްގީއަށް މަގުފަހިކުރާނެ ތާރީޚީ ދަތުރުފުޅެއް ކަމަށް ބެލެވެއެވެ.
ކޮމެންޓް