މި ވެރިކަން 10 އަހަރު ވަންދެން އޮންނަން ޖެހޭ - އަދުރޭ

ދިވެހިން ބޭނުންވާ ގޮތަށް ދިވެހިންގެ ރާއްޖެ ބިނާކުރުމަށްޓަކާ އެއް ވެރިކަމެއް 10 ނުވަތަ 15 އަހަރު ވަންދެން އޮންނަންޖެހޭ ކަމަށް ރައްޔިތުން މަޖިލީހުގެ ރައީސް އަބްދުލްރަހީމް އަބްދުﷲ ވިދާޅުވެއްޖެ އެވެ.

ޕީއެންސީ އަށް މެމްބަރުން އިތުރުކުރަން ހުޅުމާލޭގައި މިއަދު ކުރިއަށް ގެންދިޔަ އިވެންޓަށްފަހު މީޑިއާތަކާ ވާހަކަދައްކަވަމުން އަބްދުލްރަހީމް ވިދާޅުވީ ޕީއެންސީގެ އަމާޒަކީ ރާއްޖެ މިއޮތް ހާލަތުން އެހެން ހާލަތަކަށް ބަދަލުކޮށް ދިވެހިންގެ ރާއްޖެއެއް ދިވެހިން އެދޭ ގޮތަށް ބިނާކޮށްދިނުން ކަމަށެވެ.

"ދިވެހިންގެ ރާއްޖެއެއް ދިވެހިން އެދޭގޮތަށް ބިނާކުރުމަށްޓަކާ އެބަ ބޭނުންވޭ 10 ވަރަކަށް 15 އަހަރު އެއް ވެރިކަމެއް އޮންނަން. އެ ވެރިކަމަކަށް ބަލާއިރު ރައީސް ޑރ. މުހައްމަދު މުއިއްޒުގެ ސިޔާސަތަކީ ދިވެހިންގެރާއްޖެއެއްގެ ސިޔާސަތު،" އަބްދުލްރަހީމް ވިދާޅުވި އެވެ.

އަބްދުލްރަހީމް ވިދާޅުވީ އަމާޒަކީ ރައީސް މުއިއްޒުގެ ވެރިކަން ދެމިގެންދާނެ ގޮތަކަށް މަސައްކަތް ބައްޓަން ކުރުން ކަމަށާއި ޕީއެންސީ އޮތީ މި ފަސް އަހަރު އެކަނި ވެރިކަން ކުރާ ގޮތަކަށް ނޫން ކަމަށެވެ.

"އަޅުގަނޑުމެން އެންމެ މިތިބީ ދެވަނަ ދައުރެއް ރައީސުލްޖުމްހޫރިއްޔާ އަށް ހޯދާދިނުމުގެ ވިސްނުމުގައި. އެ މަސައްކަތް މި ކުރަނީ އިރާދަކުރެއްވީޔާ އެކަން ކާމިޔާބުކުރާނަން،" އަބްދުލްރަހީމް ވިދާޅުވި އެވެ.

ޕީއެންސީން ކުރަމުން އަންނަނީ ގައުމީ މަސައްކަތެއް ކަމަށާއި އެ ޕާޓީން މަސައްކަތް ކުރަމުން އަންނަނީ އަމާޒެއް އޮވެގެން ކަމަށްވެސް އަބްދުލްރަހީމް ވިދާޅުވި އެވެ. ނަމަވެސް ބައެއް އިދިކޮޅު ފަރާތްތަކުން ބޭނުންވާ ކަންކަން ހާސިލު ނުވުމުން ގޭގައި ތިބެ ރައްޔިތުންނަށް ކަންކަން އޮޅުވާލައި، ފިތުނަ ފަސާދަ އުފައްދަން މަގުފަހިކުރަމުންދާ ކަމަށް އަބްދުލްރަހީމް ވިދާޅުވި އެވެ.