މުވައްޒަފުންގެ އިހުމާލުން ކަސްޓަމަރުންނަށް މާލީ ގެއްލުމެއް ނުވާނެ: ބީއެމްއެލް

އެންމެ ގިނަބަޔަކު ފައިސާގެ މުއާމަލާތްކުރަނީ ބީއެމްއެލް މެދުވެރިކޮށް

މުވައްޒަފެއްގެ އިހުމާލުން ނުވަތަ ގަވާއިދާ ޚިލާފު އަމަލަކުން ކަސްޓަމަރުންނަށް އެއްވެސް މާލީ ގެއްލުމެއް ނުވާނެ ކަމުގެ ޔަގީންކަން ދޭ ކަމަށް ބޭންކު އޮފް މޯލްޑިވްސް (ބީއެމްއެލް) އިން މިއަދު ބުނެފިއެވެ.

ބޭންކުން މިފަދައިން ބުނެފައި މިވަނީ ބީއެމްއެލްގެ ކަސްޓަމާ ސަރވިސް އެސިސްޓެންޓެއްގެ މައްޗަށް ކަސްޓަމަރުންގެ އެކައުންޓުތަކުގައި ހުރި ފައިސާއަށް ޚިޔާނާތްތެރިވުމުގެ ކުށް ސާބިތުވެ، ކްރިމިނަލް ކޯޓުން އިއްޔެ ހުކުމް ކުރުމާ ގުޅިގެންނެވެ.

ބީއެމްއެލްގެ ހެޑް އޮފް ޕަބްލިކް ރިލޭޝަންސް މުޙައްމަދު ސަޢީދު މިއަދު ވިދާޅުވީ، 2021 ވަނަ އަހަރު ހިނގި މި މައްސަލަ ބޭންކަށް ފާހަގަވުމާއެކު އެ މުވައްޒަފު ވަގުތުން މަސައްކަތުން އެކަހެރިކުރި ކަމަށެވެ. އޭނާ އިތުރަށް ވިދާޅުވީ މައްސަލަ ބެލުމަށްފަހު އެ މުވައްޒަފު މަޤާމުން ވަކިކޮށް، 2021 ޑިސެމްބަރު 7 ގައި މައްސަލަ ފުލުހުންނަށް ހުށަހެޅި ކަމަށެވެ. އަދި ކަސްޓަމަރުންގެ އަތުން ގެއްލުނު ފައިސާ ބޭންކުން ކަސްޓަމަރުންނަށް ޖަމާކޮށްދިން ކަމަށްވެސް ސަޢީދު ވިދާޅުވިއެވެ.

"ބޭންކުގައި ހިނގާފާނެ ނުރަނގަޅު އަމަލެއް ނުވަތަ އިހުމާލެއް ދެނެގަތުމަށް ބޭންކުގެ ގަވާއިދުތަކާއި އުސޫލުތައް ހަރުދަނާކޮށް، އިންޓަރނަލް ކޮންޓްރޯލްތައް ބޭންކުގައި ޤާއިމްކޮށްފައިވޭ،" ސަޢީދު ވިދާޅުވިއެވެ. އަދި ބޭންކުގެ އެއްވެސް މުވައްޒަފަކު ގަވާއިދާ ޚިލާފު ކަމެއް ކޮށްފި ނަމަ އެކަމެއް ތަޙުޤީޤުކޮށް އަޅަން ޖެހޭ އެންމެ ހަރުކަށި ފިޔަވަޅު އަބަދުވެސް އަޅާނެ ކަމަށްވެސް އޭނާ ވިދާޅުވިއެވެ.

ބީއެމްެއެލް