ކޮފްސީ ސިރަޕް ބޭނުންކުރުމާއި އެތެރެކުރުމަށް އަލުން ހުއްދަދީފި

ރާއްޖެ އެތެރެކޮށް ބޭނުންކުރަމުން ގެންދިޔަ ކެއްސާތީ ބޯ ބޭހެއް ކަމަށްވާ 'ކޮފްސީ ސިރަޕް' އިން މައްސަލަތަކެއް ފާހަގަވެގެން އެ ބޭސް ރާއްޖޭގައި ބޭނުންކުރުމާއި އެތެރެކުރުން ވަގުތީ ގޮތުން މަނާކުރުމަށްފަހު އަލުން ހުއްދަ ދީފިއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިދިޔަ މަހުގެ 19 ވަނަ ދުވަހު ކޮފްސީ ސިރަޕް ބޭނުންކުރުމާއި ވިއްކުން މަނާކުރި އެވެ. އެ އިދާރާއިން އޭރު ބުނެފައިވަނީ އެ ސިރަޕުގައި ކުނޑިކޮޅުތަކެއް ހުންނަކަން ފާހަގަކުރެވިފައިވާ ކަމަށެވެ.

އެމްއެފްޑީއޭ އިން މިއަދު ނެރުނު ބަޔާނެއްގައި ބުނެފައިވަނީ އެ ބޭހުގެ މާކެޓުން ލިބެންހުރި ބެޗުތަކުގެ ސާމްޕަލް ނަގައި އިތުރަށް ޓެސްޓްކޮށް ބަލަންޖެހޭ ކަންކަން ބެލުމަށްފަހު ބޭހުގައި މައްސަލައެއް ނެތްކަން ފާހަގަކުރެވިފައިވާ ކަމަށެވެ. އެހެންކަމުން، މިހާރު އެ ބޭސް ބޭނުންކުރުމާއި އެތެރެކުރުމުގެ ހުއްދަ ދީފައިވާ ކަމަށް އެމްއެފްޑީއޭ އިން ބުނެފައިވެއެވެ.

ކޮފްސީ ސިރަޕަކީ އިންޑިއާގެ ޗެންނާއީއަށް ނިސްބަތްވާ، 'އެމްއެމްސީ ހެލްތު ކެއާ' ނަމަކަށް ކިޔާ ކުންފުންޏަކުން އުފައްދާ ބޭހެކެވެ.

ފާހަގަކޮށްލެވޭ ކަމަކީ، ރާއްޖެއަށް އެތެރެކުރާ ކެއްސާތީ ބޯ ބޭހުގެ ބާވަތްތަކަކީ އެމްއެފްޑީއޭ އިން ކުރަމުންދާ ތަހުލީލުތަކުގައި އާންމުކޮށް ވެސް މައްސަލަތައް ފާހަގަވާ ބޭސްތަކެކެވެ. މީގެ ކުރިން ވެސް ކެއްސާތީ ބޯ ބޭހުގެ ބައެއް ބްރޭންޑުތަކުގެ ބޭސްތަކުން މައްސަލަތައް ދިމާވެ ބައެއް ބޭސްތައް ރާއްޖެ އެތެރެކުރުން މަނާކޮށްފައި ވެސް ވެއެވެ.

އެމްއެފްޑީއޭ އިން ރައްޔިތުންނަށް އިލްތިމާސްކޮށްފައިވަނީ ބޭސް ބޭނުންކުރުމުގައި ސަމާލުވުމަށާއި، އެއްވެސް މައްސަލައެއް ފާހަގަކުރެވިއްޖެނަމަ ވަގުތުން އެ އިދާރާއަށް އެންގުމަށެވެ.