ހިޒްބުاللهގެ ވެރިޔާ ނަސްރުاللهގެ މަގާމަށް ހާޝިމް ސަފިއެއްދީން

ލުބުނާނުގެ ވެރިރަށް ބެއިރޫތަށް އިސްރާއީލުން ދިން ހަމަލާތަކަށް ފަހު ހިޒްބުاللهގެ ލީޑަރު ޙަސަން ނަޞްރުالله އަވަހާރަކޮށްލުމާއި ގުޅިގެން،  އެމަގާމަށް ނަސްރުﷲގެ ތިމާގެ ބޭފުޅެއްކަމަށްވާ ހާޝިމް ސަފިއެއްދީން ވަޑައިގެންފާނެކަމަށް ބެލެވެންފަށައިފިއެވެ.

ހާޝިމް ސަފިއެއްދީނަކީ، ހިޒްބުﷲގެ އެންމެ ފާހަގަކޮށްލެވޭ ޝަޚްޞިއްޔަތުތަކުގެ ތެރޭގައި ހިމެނޭ ބޭފުޅެކެވެ. އަދި އީރާނުގެ ޝިޔާ މުސްލިމުންނާ ވަރަށް ގާތް ދީނީ އަދި އާއިލީ ގުޅުން ވެސް އޮތް ބޭފުޅެކެވެ.

ސަފިއެއްދީންގެ ސިފަތަކަކީ، އޭނާގެ މަންމަ ފަރާތު ތިމާގެ ބޭބެއެއް ކަމަށްވާ، ނަސްރުﷲއާ ވަރަށް އެއްގޮތް ސިފަތަކެކެވެ. ނަމަވެސް އޭނާއަކީ ނަސްރުﷲއަށްވުރެ އެތައް އަހަރެއް ޅަ، 50 ގެ ފަހުކޮޅު ނުވަތަ 60 ގެ ކުރީކޮޅުގެ އުމުރުފުރައިގެ ބޭފުޅެކެވެ.

ހިޒްބުﷲއާ ގާތް ގުޅުމެއް އޮތް، ނަން ހާމަނުކުރުމަށް އެދި ވާހަކަދެއްކި މަޞްދަރެއް ބުނިގޮތުގައި، ސަފިއެއްދީނަކީ ހިޒުބުﷲގެ އެންމެ މަތީ މަޤާމަށް ވަޑައިގަތުން  "އެންމެ ގާތް" ކެންޑިޑޭޓެވެ.

ހިޒްބުاللهގެ އެންމެ ބާރުގަދަ ނިންމުންތައް ނިންމާ ޝައުރާ ކައުންސިލްގައި ހިމެނިވަޑައިގަންނަވާ ސަފީދީން ވަނީ، އެމެރިކާ އާއި ސައުދީ އަރަބިއްޔާއިން 2017 ވަނަ އަހަރު "ޓެރަރިސްޓެއް" ކަމަށް ކަނޑައެޅި ޓެރަރިސްޓުންގެ ލިސްޓުގައި ހިމަނައިފަ އެވެ.

ނަސްރުﷲގެ މަރަށްފަހު ހިޒްބުﷲގެ ޑެޕިއުޓީ ޗީފް ނައީމް ޤާސިމް އޮޓޮމެޓިކުން ހިޒްބުﷲގެ ލީޑަރޝިޕް ހަވާލުވިނަމަވެސް، އައު ސެކްރެޓަރީ ޖެނެރަލްއެއް އިންތިޚާބުކުރުމަށް ޝޫރާ ކައުންސިލް ބައްދަލުވާން ޖެހެއެވެ.

އީރާނުގެ މުޤައްދަސް ޤޮމް ސިޓީގައި ސަފިއެއްދީން، ދީނީ ތަޢުލީމު ހާސިލުކުރެއްވުމުން، އެގައުމާ އެކު ވަރަށް ގާތް ގުޅުމެއް އޮވެއެވެ.

ސަފިއެއްދީންގެ ދަރިފުޅު ކައިވެނި ބައްލަވައިގެން އުޅުއްވަނީ، 2020 ގައި އިރާޤުގައި އެމެރިކާގެ ހަމަލާއެއްގައި އަވަހާރިވި އިރާނުގެ ރިވޮލިއުޝަނަރީ ގާޑްސްގެ ބޭރުގެ އޮޕަރޭޝަންތަކުގެ ކޮމާންޑަރު ޖެނެރަލް ޤާސިމް ސުލައިމާނީގެ ދަރިފުޅާއެވެ.

ސަފިއެއްދީންގެ ލަޤަބަކީ ސައްޔިދެވެ. ނަސްރުﷲ ފަދައިން އޭނާގެ ކަޅު ފަގުޑިން ދައްކުވައިދެނީ އޭނާއަކީ ކީރިތި ރަސޫލާގެ ދަރިކޮޅުން އައިސްފައިވާ ބޭފުޅެއްކަމެވެ.

އެތައް އަހަރެއް ވަންދެން  މީހުންގެ ލޯތަކަށް ފޮރުވިގެން އުޅުނު ނަސްރުاللهއާ ހިލާފަށް ސަފިއެއްދީން ވަނީ ދާދި ފަހުން ބޭއްވި ސިޔާސީ އަދި ދީނީ ހަރަކާތްތަކުގައި ފާޅުގައި ފެނިގެން ގޮސްފަ އެވެ.

ކާޑިފް ޔުނިވާސިޓީގައި، ހިޒްބުاللهއާ ބެހޭ ގޮތުން ދިރާސާ ކުރައްވާ ލުބުނާނުގެ ރިސާޗަރެއް ކަމަށްވާ އަމާލް ސާދު ވިދާޅުވި ގޮތުގައި، ސަފިއެއްދީނަކީ ނަސްރުاللهއަށް "އެންމެ ބޮޑަށް ތާއީދު ކުރާ މީހާ" ކަމަށް އެތައް އަހަރެއް ވަންދެން މީހުން ބުނަމުން ގޮސްފައިވެއެވެ.

ހިޒްބުالله އަކީ އީރާނުގެ ރިވޮލިއުޝަނަރީ ގާޑްސްގެ އިސްނެންގެވުމެއްގެ ދަށުން އުފެއްދި ޖަމާއަތެކެވެ.  2000 ވަނަ އަހަރާ ހަމައަށް ލުބްނާނުގެ ދެކުނުގައި އިސްރާއީލު ހިފާފައިވާ ބިންތަކުގައި ވަޒަންވެރިވެގެން ތިބި ސިފައިންނާ ހަނގުރާމަކޮށް އެ ބިންތައް އަލުންވަނީ ހޯދާފައެވެ.

މިދިޔަ ޖުލައި މަހު ބެއިރޫތުގެ ދެކުނުގެ އަވަށެއްގައި ދެއްވި ތަގުރީރެއްގައި ސަފިއެއްދީން ވަނީ ހިޒްބުاللهގެ ލީޑަޝިޕް ތަރުތީބު ވަމުން އަންނަންވީ ގޮތުގެ މައްޗަށް އިޝާރާތް ކުރައްވައި ވާހަކަފުޅު ދައްކަވާފައެވެ.

ހިޒްބުﷲ އިން ވަނީ ނަސްރުﷲ އަވަހާރަކޮށްލި ނަމަވެސް ފަލަސްތީނުގެ ހައްގުގައި އެ ޖަމާއަތުން ކުރަމުންދާ މަސައްކަތަށް އެއްވެސް ބުރުލެއް ނާންނާނެ ކަމަށް ބުނެފައެވެ.

ނަސްރުﷲ އަވަހާރަކޮށްލިއިރު، ހަމާސް ޖަމާއަތުގެ ވެރިޔާ އިސްމާއިލް ހަނިއްޔާ ވެސް އީރާނުގައި ހުންނަވަނިކޮށް ދިން ބޮމުގެ ހަމަލާއެއްގައި މިދިޔަ ޖުލައި މަހު ވަނީ އަވަހާރަކޮށްލައިފަ އެވެ.