މަސްވެރިންނަށް އަމާޒުކޮށް 100 ދޯންޏަކަށް ލޯނު ދޫކުރަން ނިންމައިފި

މިނިސްޓަރ އަޙްމަދު ޝިޔާމް

މަސްވެރިކަމުގެ ދާއިރާ ކުރިއެރުވުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، ލޮނުފެން ބޭނުންކޮށްގެން މަސްފިނިކުރާ ނިޒާމު (އާރު.އެސް.ޑަބްލިޔު ސިސްޓަމް) ޤާއިމުކުރުމަށް 100 ދޯންޏަކަށް ލޯނުދޫކުރަން ނިންމައިފިއެވެ.

މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަހުމަދު ޝިޔާމު ސޯޝަލްމީޑިއާގައި ކުރެއްވި ޕޯސްޓެއްގައި ވިދާޅުވި ގޮތުގައި، މި ލޯނު ސްކީމްގެ ދަށުން އާރު.އެސް.ޑަބްލިޔު ސިސްޓަމާއި ޖަނަރޭޓަރު އަދި ސޯލަރ ގަތުމަށް ހޭދަވާ އަގުގެ 35 އިންސައްތަ އޮޑިވެރިން އަނބުރާ ދައްކާކަށް ނުޖެހޭނެއެވެ.

މިނިސްޓަރ އިތުރަށް ވިދާޅުވި ގޮތުގައި، މި ލޯނު ދެއްކުމަށް 10 އަހަރުގެ މުއްދަތެއް ލިބޭނެއެވެ. އަދި 6 މަސްދުވަހުގެ ގްރޭސް މުއްދަތެއްވެސް ލިބޭނެއެވެ. މި ލޯނު ސްކީމަކީ އިސްލާމީ ޝަރީޢާގެ ހަމަތަކުގެ މަތިން ތަކެތި ގަތް އަގާއި، އަގަށް ފައިދާގެ ގޮތުގައި ލެވޭ މިންވަރު ކަނޑައަޅައިގެން ކުރިޔަށް ގެންދެވޭ ސްކީމެކެވެ.

މި ލޯނު ސްކީމާ ގުޅޭ މަޢުލޫމާތު ގއ. ގެމަނަފުށީގެ އޮޑިވެރިންނާއި މަސްވެރިންނަށާއި ކައުންސިލު މުވައްޒަފުންނަށް ފޯރުކޮށްދީފައިވާ ކަމަށްވެސް މިނިސްޓަރ ފާހަގަކުރެއްވިއެވެ.

މި ލޯނު ސްކީމަކީ މަސްވެރިކަމުގެ ދާއިރާ ތަރައްޤީކޮށް، މަސްވެރިންގެ އާމްދަނީ އިތުރުކުރުމަށް ސަރުކާރުން އަޅަމުންދާ ފިޔަވަޅުތަކުގެ ތެރެއިން އެޅޭ އެއް ފިޔަވަޅެވެ. މި ސްކީމްގެ ސަބަބުން މަސްވެރިންނަށް ފަސޭހަކަމާއެކު މަސް ފިނިކޮށް ބެހެއްޓުމުގެ ފުރުސަތު ލިބި، އެމީހުންގެ މަސައްކަތަށް ބޮޑު ކުރިއެރުމެއް ލިބޭނެކަމަށް އުއްމީދުކުރެވެއެވެ.

މަސްވެރިކަމާ ބެހޭ ވުޒާރާ މިނިސްޓަރ ޝިޔާމް