އިންޑިއާއިން ނަގާފައިވާ 150 މިލިއަން ޑޮލަރުގެ ލޯނެއް ދެއްކުމުގެ މުއްދަތު އިތުރުކޮށްދޭން ސަރުކާރުން އެދެފި

----

ދިވެހިރާއްޖެއިން އިންޑިއާއަށް އަދާކުރަން ޖެހޭ 150 މިލިއަން ޑޮލަރުގެ ލޯނެއް ރޯލްއޯވާ ކުރަން ފޮރިން މިނިސްޓަރު މޫސާ ޒަމީރު އިންޑިއާއަށް ކުރެއްވި ރަސްމީ ދަތުރުފުޅުގައި އެދިވަޑައިގެންފިއެވެ.

މިކަން ހާމަކުރެއްވީ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ފޮރިން މިނިސްޓަރު މޫސާ ޒަމީރު ދެއްކެވި ވާހަކަފުޅުގައެވެ.

ޒަމީރު ވިދާޅުވިގޮތުގައި ރާއްޖެއިން އިންޑިއާ ސަރުކާރުގައި އެދުނީ 2019 ވަނަ އަހަރު ބަޖެޓު ސަޕޯޓަށް ނެގި 200 މިލިއަން ޑޮލަރުގެ ތެރެއިން 150 މިލިއަން ޑޮލަރު އަނބުރާ އަދާ ކުރަން ޖެހޭ މުއްދަތު އިތުރު ކޯށްދިނުމަށެވެ.

އެގޮތުން މި އަހަރު ޖެނުއަރީ މަހުގައި 200 ލިއަން ޑޮލަރުގެ ތެރެއިން 50 މިލިއަން ޑޮލަރު ދިވެހި ސަރުކާރުން އަނބުރާ އަދާ ކޮށްފައިވާކަން ފާހަގަކުރައްވާ މިނިސްޓަރު ޒަމީރު ވިދާޅުވީ އެކަމުގެ ބަދަލުގައި އިންޑިއާ ސަރުކާރުން އެއްވެސް ކަމަކަށް އެދިފައި ނުވާ ކަމަށެވެ.

މީގެއިތުރުން ސަރުކާރުގެ ދަރަނި ދެގުނައަށް އިތުރުވެފައިވާކަން ފާހަގަކުރައްވާ މިނިސްޓަރު ވިދާޅުވީ ދަރަނި ނަގާފައި އޮތް ފަރާތްތަކާއެކު ދަރަނި އަދާކުރުމަށް ލުއި ގޮތްތައް ހޯދުމަށް އަބަދުވެސް މަސައްކަތް ކުރަމުންދާ ކަމަށެވެ.

މޫސާ ޒަމީރު