އިންޑިއާގެ ހިންދޫ އަޅުކަމުގެ ފެސްޓިވަލެއްގައި 37 ކުޑަކުދިން ހިމެނޭހެން 46 މީހުން މަރުވެއްޖެ

އިންޑިއާގައި މިފަދަ އަޅުކަންތަކުގައި ގިނަބަޔަކު މަރުވަމުންދޭ

އިންޑިއާގެ ބިހާރު ސްޓޭޓްގައި ބޭއްވުނު ތިން ދުވަހުގެ ހިންދޫ ފެސްޓިވަލެއްގައި ހިނގި ހާދިސާތަކެއްގައި މަދުވެގެން 46 މީހުން މަރުވެއްޖެއެވެ.

މަރުވި މީހުންގެ ތެރޭގައި 37 ކުޑަކުދިން ހިމެނޭ ކަމަށް ބިހާރުގެ ޑިޒާސްޓަރ މެނޭޖްމަންޓް ޑިޕާޓްމަންޓުން ހާމަކޮށްފިއެވެ.

މި ހާދިސާތައް ހިނގާފައިވަނީ ސްޓޭޓްގެ 15 ޑިސްޓްރިކްޓެއްގައެވެ. މިހާތަނަށް 43 ހަށިގަނޑު ފެނިފައިވާއިރު، އަދިވެސް ނުފެނި ވާ 3 މީހުން މަރުވެފައިވާ ކަމަށް ބެލެވެއެވެ. ބުރާސްފަތި ދުވަހު ނިމުނު މި ފެސްޓިވަލްގައި މައިންނާއި ދަރިން ކޯރުތަކާއި ފެންގަނޑުތަކަށް އެރި ސާފުވުމުގެ ރަސްމިއްޔާތުތައް ބާއްވައެވެ. އަދި މައިން 24 ގަޑިއިރު ރޯދަ ހިފައި، ދަރިންގެ ދުޅަހެޔޮކަމަށް އެދި ދުޢާ ކުރެއެވެ.

ފާއިތުވި ދުވަސްތަކުގައި ވަރަށް ބޮޑަށް މޫސުން ގޯސްވެ، ވާރޭ ވެހުމުގެ ސަބަބުން ސްޓޭޓްގެ އެކި ސަރަޙައްދުތަކުގައި ފެންބޮޑުވެފައިވާ ކަމަށް އޮފިޝަލުން ބުނެފައިވެއެވެ. މި ހާދިސާގައި މަރުވި ކޮންމެ މީހެއްގެ އާއިލާއަށް 400,000 ރުޕީސް (4,784 ޑޮލަރު) ގެ ބަދަލެއް ދިނުމަށް ސްޓޭޓް ސަރުކާރުން ނިންމާފައިވެއެވެ.

މިފަދަ ދީނީ ފެސްޓިވަލްތަކުގައި ހިނދުމާއި ތޮއްޖެހުމުގެ ސަބަބުން މަރުވުން ފަދަ ހާދިސާތައް ހިނގުމަކީ އިންޑިއާގައި އާންމު ކަމެކެވެ. މިގޮތުން ޖުލައި މަހު އުތުރު އިންޑިއާގައި ބޭއްވުނު ދީނީ ފެސްޓިވަލެއްގައި ހިނގި ތޮއްޖެހުމެއްގައި މަދުވެގެން 121 މީހުން މަރުވެފައިވެއެވެ.

އިންޑިޔާ