އަމިއްލަ މަސައްކަތްތެރިންގެ ދަފްތަރު އެކުލަވާލަން ފަށައިފި

އަމިއްލަ މަސައްކަތްކުރާ ފަރާތްތައް ދަފްތަރު ކުރުމުގެ މަސައްކަތް ބިޒްނަސް ސެންޓަރ ކޯޕަރޭޝަން (ބީސީސީ) އިން ފަށައިފައެވެ.

މި ދަފްތަރަކީ ރާއްޖޭގެ އެންމެ ކުދި، ކުދި އަދި މެދުފަންތީގެ ވިޔަފާރިތައް މަރުކަޒީކޮށް ރަޖިސްޓަރީ ކުރުމުގެ ނިޒާމުގެ ބައެކެވެ.

ބީސީސީން މަޢުލޫމާތު ދެއްވާފައިވާ ގޮތުގައި މި ދަފްތަރުގެ މަޤްޞަދަކީ އަމިއްލަ މަސައްކަތްކުރާ ފަރާތްތަކާއި އެފަރާތްތަކުގެ މަސައްކަތުގެ ދާއިރާތައް ދެނެގަނެ، އެފަރާތްތަކަށް ވިޔަފާރީގެ ފަހި މާޙައުލެއް ޤާއިމުކޮށްދިނުމެވެ. އަދި މި ދަފްތަރުގެ ސަބަބުން އެފަދަ ވިޔަފާރިތައް ތަރައްޤީކުރުމަށް ބޭނުންވާ އެހީތެރިކަން ފޯރުކޮށްދިނުމަށް ފަސޭހަވެގެންދާނެއެވެ.

ދަފްތަރުގައި ރަޖިސްޓަރީވުމުގެ ފުރުޞަތު މިހާރު ވަނީ ހުޅުވާލެވިފައެވެ. ރަޖިސްޓަރީވުމަށް ޚާއްޞަ އޮންލައިން ޕޯޓަލެއް ތަޢާރަފުކޮށްފައިވާއިރު، މި ޕޯޓަލްގެ ލިންކު ބީސީސީގެ ސޯޝަލް މީޑިއާ ޕްލެޓްފޯމްތަކުންނާއި ވެބްސައިޓުން ލިބެން ހުންނާނެއެވެ. އަދި ރަޖިސްޓަރީވުމަށް އެހީތެރިކަން ބޭނުންވާ ފަރާތްތަކަށް ބީސީސީގެ މައި އޮފީހުންނާއި އަތޮޅުތަކުގައި ޤާއިމުކޮށްފައިވާ ބިޒްނަސް ސެންޓަރުތަކުން އެހީތެރިކަން ފޯރުކޮށްދެވޭނެއެވެ.

ބީސީސީން ބާރުއަޅުއްވަނީ ރާއްޖޭގެ އެކި ކަންކޮޅުތަކުގައި އަމިއްލަ މަސައްކަތްކުރާ އެންމެހާ ފަރާތްތަކުން މި ދަފްތަރުގައި ރަޖިސްޓަރީވުމަށެވެ. އެ ފަރާތުން ބުނާ ގޮތުގައި މި ދަފްތަރުގައި ރަޖިސްޓަރީވުމަކީ ވިޔަފާރީގައި ކުރިއަށް ދިއުމަށް ބޭނުންވާ ގިނަ ކަންކަމުގައި ލުއިފަސޭހަ ލިބިގެންދާނެ ކަމެކެވެ.