ހުޅުމާލެއިން 16 ބިދޭސީން އަތުލައިގަތުމާއެކު 3 ކެފޭއަކަށް ނޯޓިސް

އިމިގްރޭޝަނުން ހުޅުމާލޭގައި ހިންގި ޚާއްސަ އޮޕަރޭޝަނެއްގައި ގަވާއިދާ ޚިލާފަށް މަސައްކަތްކުރަމުންދިޔަ 16 ބިދޭސީން އަތުލައިގަނެފިއެވެ.

މި އޮޕަރޭޝަން ހިންގީ ހުޅުމާލޭގެ ފުރަތަމަ ފިޔަވަހީގައި ހުރި ހަ ކެފޭއެއްގައެވެ.

އިމިގްރޭޝަނުން ބުނިގޮތުގައި މި އޮޕަރޭޝަން ކުރިއަށް ގެންދިޔައީ މިދިޔަ ދެ ދުވަހުގެ ތެރޭގައެވެ. އަދި މީގެ އިތުރުން، ބޭނުންވާ ހުއްދަތައް ނުނަގައި ހިންގަމުންދިޔަ ތިން ކެފޭއަކަށް ކަމާ ގުޅުންހުރި ފަރާތްތަކުން ނޯޓިސް ދީފައިވާކަމަށްވެސް އިމިގްރޭޝަނުން މަޢުލޫމާތު ދީފައިވެއެވެ.

ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަށް އިމިގްރޭޝަނުން ކަމާބެހޭ އިދާރާތަކާ ގުޅިގެން ޚާއްސަ އޮޕަރޭޝަންތަކެއް ކުރިއަށް ގެންދެއެވެ. މި އޮޕަރޭޝަންތަކުގައި އަތުލައިގަނެވޭ އެއްވެސް ބިދޭސީއަކަށް ދެވަނަ ފުރުސަތެއް ނުދޭނެކަމަށް އިމިގްރޭޝަނުން ބުނެފައިވެއެވެ.

ފާއިތުވި 10 މަސްދުވަހުގެ ތެރޭގައި ގަވާއިދާ ޚިލާފުވެގެން 4,054 ބިދޭސީން ވަނީ ޤައުމުން ބޭރަށް ފޮނުވާލާފައެވެ.