ކުޑަކުދިންގެ މެދުގައި އާރުއެސްވީ ފެތުރެމުންދާތީ އެކަމަށް ސަމާލުވުމަށް އެދިއްޖެ

ނޭވާލާ ނިޒާމަށް އަސަރުކުރާ ރެސްޕިރޭޓަރީ ސިންސިޝަލް ވައިރަސް (އާރުއެސްވީ) ރާއްޖޭގައި ހަލުއިކަމާއެކު ފެތުރެމުންދާތީވެ އެމަމަށް ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެދިއްޖެއެވެ.  

މި ބަލި އެންމެ އާންމުކޮށް ފެތުރެމުންދަނީ ކުޑަކުދިންގެ މެދުގައި ކަމަށްވެސް އެޗްޕީއޭއިން ބުނެފައިވެއެވެ.

އެޗްޕީއޭއިން ނެރުނު ބަޔާނެއްގައި ބުނެފައިވާ ގޮތުގައި ކުޑަކުދިންގެ މެދުގައި އާރުއެސްވީގެ ކޭސްތައް އިތުރުވަމުން ދިއުމާ ގުޅިގެން، މިހާރު ވަނީ މި ހާލަތު ގާތުން މޮނިޓަރ ކުރަން ފަށާފައެވެ. އަދި ބަލި އިތުރަށް ނުފެތުރޭނެ ގޮތަކަށް، މި ދުވަސްވަރު އާންމުން ސަމާލުވެ އުޅުމަށް އެޗްޕީއޭއިން އިލްތިމާސްކޮށްފައިވެއެވެ.

"މިވަގުތު އަޅުގަނޑުމެން ވަރަށް ބޮޑަށް ކަންބޮޑުވޭ ކުޑަކުދިންގެ މެދުގައި އާރުއެސްވީ ފެތުރެމުންދާ ސްޕީޑާ މެދު. ޚާއްޞަކޮށް ދެ އަހަރުން ދަށުގެ ކުދިންނަށް މި ބަލީގެ ނުރައްކާ ވަރަށް ބޮޑު" އެޗްޕީއޭގެ ޑިރެކްޓަރ ޖެނެރަލް ޑރ. ފަތުމަތު ނަދާ ވިދާޅުވިއެވެ.

މި ބަލިން ރައްކާތެރިވުމަށް އެޗްޕީއޭއިން ވަނީ ރަނގަޅަށް އަތްދޮވުމާއި، މީހުން އެއްވެ އުޅޭ ތަންތަނަށް ނުދިއުމާއި، މާސްކް އެޅުން ފަދަ ފިޔަވަޅުތައް އެޅުމަށް އާންމުންނަށް އިރުޝާދު ދީފައެވެ. އަދި ހުން އައުމާއި ކެއްސުމާއި ނޭވާލުމަށް އުނދަގޫވާނަމަ، ވީ އެންމެ އަވަހަކަށް ޑޮކްޓަރުގެ ފަރުވާ ހޯދުމަށްވެސް އެޗްޕީއޭއިން ވަނީ އިލްތިމާސްކޮށްފައެވެ.

ކުޑަކުދިންގެ ޑޮކްޓަރު އަބްދުﷲ ނިޔާފް ވިދާޅުވި ގޮތުގައި، އާރުއެސްވީ ޖެހޭ ތުއްތު ކުދިންނަށް އާންމުކޮށް ހަފުތާއެއް ނުވަތަ 10 ދުވަހަށް ބަލި ދިގުލައިގެންދެއެވެ. އަދި ބޮޑަށް ބަލިވާ ކުދިންނަށް އެއަށްވުރެ ގިނަ ދުވަހަށް ބަލި ދިގުލައިގެންދާ ކަމަށް އޭނާ ވިދާޅުވިއެވެ.

މި ހާލަތާ ގުޅިގެން، އެޗްޕީއޭއިން ވަނީ ސްކޫލުތަކާއި ޕްރީސްކޫލުތަކަށް ޚާއްޞަ އިރުޝާދުތަކެއް ދީފައެވެ. އަދި ބަލި ފެތުރުން ހުއްޓުވުމަށް އަޅަންޖެހޭ ފިޔަވަޅުތައް އެޅުމަށް ހުރިހާ ފަރާތްތަކަށް ގޮވާލާފައިވެއެވެ.