ގެއްލުންވާތީ ފެނަކައިގެ 16 ޕްރޮޖެކްޓެއް ބާތިލުކޮށްފި

ފެނަކަ ކޯޕަރޭޝަނަށް ގެއްލުންވާތީ 16 ރަށެއްގައި ކުރިއަށްގެންދަން ނިންމާފައިވާ ޕްރޮޖެކްޓުތައް ބާތިލުކޮށްފި އެވެ.

ފެނަކައިން މިއަދު ބޭއްވި ނޫސްވެރިންގެ ބައްދަލުވުމުގައި އެ ކުންފުނީގެ ޑިރެކްޓަރު އަބްދުލް ވާހިދު މުހައްމަދު ވިދާޅުވީ، ކުރީ ސަރުކާރުން ފެނަކައާ ހަވާލުކުރި 16 ރަށެއްގެ ނަރުދަމާ ޕްރޮޖެކްޓްގެ މަސައްކަތްތައް އެއްބަސްވި ގޮތަށް ކުރިއަށް ނުގެންދާތީ، ކޮންސްޓްރަކްޝަން މިނިސްޓްރީއާ ދެމެދު ހަދާފައިވާ އެއްބަސްވުން ބާތިލްކޮށްފައިވާ ކަމަށެވެ.

އެއްބަސްވުން ބާތިލު ކޮށްފައިވާ ރަށްތަކަކީ ބ. ދޮންފަނާއި ބ. ފެހެންދޫ އާއި ބ.ފޮޅަދޫ އާއި ބ. ކުޑަރިކިލާއި ބ. ކިހާދޫ އާއި ށ. ބިލަތްފައްސާއި ށ. ނޫމަރާ އާއި ނ. ލަންދޫ އާއި ނ. މިލަންދޫ އާއި ނ. މަގޫދޫ އާއި ތ. މަޑިފުއްޓާއި ތ. ދިޔަމިގިއްޔާއި މ. ރަތްމަންދޫ އާއި މ. ނާލާފުއްޓާއި ލ. ކުނަހަންދޫ އަދި އދ. ފެންފުއްޓެވެ.

"ސަރުކާރުން ފެނަކައާ 2022 ވަނަ އަހަރު ހަވާލުކޮށްފައިވާ 16 ރަށެއްގެ ފެނާއި ނަރުދަމާ ޕްރޮޖެކްޓުތައް މިހާރު ކޮންސްޓްރަކްޝަން މިނިސްޓްރީން ވަނީ ޓާމިނޭޓުކޮށްފައި،" ވާހިދު ވިދާޅުވި އެވެ.

ވާހިދު ވިދާޅުވީ މި ޕްރޮޖެކްތުތައް ފުރަތަމަ ކޮންޓްރެކްޓު ކުރެވުނު އިރު ގާތްގަނޑަކަށް 92 މިލިއަން ރުފިޔާ އެޑްވާންސް ޕޭމެންޓުގެ ގޮތުގައި ފެނަކައަށް ލިބިފައިވާ ކަމަށާއި އެހެން ނަމަވެސް މި ފައިސާތައް ބޭނުންކޮށްފައި ވަނީ އެންމެ ރަނގަޅަކަށް ނޫން ކަމަށެވެ. އެގޮތުން އެ ފައިސާ ހޭދަކުރީ ސީދާ އެ ޕްރޮޖެކްޓުތަކަށް ކަންވެސް ޔަގީންކަމާއެކު ބުނަން ނޭނގޭ ކަމަށާއި އެކަމާ ގުޅުން ހުރި ލިޔުންތައް ވެސް ނެތް ކަމަށް އޭނާ ވިދާޅުވި އެވެ.

މީގެއިތުރުން އެ ޕްރޮޖެކްޓުތައް ކުރިއަށް ގެންގޮސްފިނަމަ އެ ކުންފުންޏަށް ގާތްގަނޑަކަށް 170 މިލިއަން ރުފިޔާގެ ގެއްލުން ވާނެ ކަމަށާއި ބާތިލުކުރި ޕްރޮޖެކްޓްތަކުގެ ދަށުން ކޮންޓްރެކްޓަރުން މިހާތަނަށް ދޫކޮށްފައިވަނީ 55 މިލިއަން ރުފިޔާ ކަމަށް ވިދާޅުވި އެވެ. އަދި މިވަގުތަށް މަސައްކަތް ނިންމައި، ފެނަކައިން ޒިންމާވާން ޖެހޭ 384 މިލިއަން ރުފިޔާ އެބައޮތް ކަމަށްވެސް ވާހިދު ވިދާޅުވި އެވެ.