އދ. އިން ފަލަސްތީނަށް ތާއީދުކޮށް ފާސްކުރި ގަރާރުން އިސްރާއީލާއި އެމެރިކާ ހައިރާން ލިބިއްޖެ

އދ. ގެ އާންމު ޖަމްއިއްޔާއިން އިއްޔެ (19 ސެޕްޓެމްބަރު 2024) ފާސްކުރި ގަރާރެއްގައި، އިސްރާއީލުން 1967 ވަނަ އަހަރު ވެރިވެގެންފައިވާ ފަލަސްތީނުގެ ހުޅަނގު އައްސޭރިއާއި ޣައްޒާގެ ބިންތަކުން އެއްވެސް ޝަރުތެއްނެތި 12 މަސްތެރޭގައި ފޭބުމަށް ގޮވާލައިފިއެވެ.

މި ގަރާރަށް އދ. ގެ މެންބަރު 193 ގައުމުގެ ތެރެއިން 124 ގައުމަކުން ތާއީދުކޮށްފައިވާއިރު، 14 ގައުމަކުން ވަނީ ދެކޮޅަށް ވޯޓުދީފައެވެ. ގަރާރާ ދެކޮޅަށް ވޯޓުދިން ގައުމުތަކުގެ ތެރޭގައި އިސްރާއީލާއި އެމެރިކާ އަދި ޔޫރަޕްގެ އިސްތިއުމާރީ ބާރުތައް ހިމެނެއެވެ.

މި ގަރާރަކީ ބައިނަލްއަގްވާމީ އިންސާފުގެ ކޯޓުގެ އިސްތިޝާރީ ރައުޔެއްގެ މައްޗަށް ބިނާކޮށް ފާސްކުރެވުނު ގަރާރަކަށްވުމާއެކު، ގާނޫނީ ގޮތުން ވަރަށް ބާރުގަދަ އެއްޗެކެވެ. މިއަށް އަމަލުނުކޮށްފިނަމަ އަދި އަމަލު ނުކުރާ ފަރާތަށް އެހީތެރިވާ ގައުމުތައްވެސް ގާނޫނީ ގޮތުން ކުށްވެރިވާނެއެވެ.

އަރަބި އިސްލާމީ ގައުމުތަކުން ވަނީ މި ގަރާރަށް މަރުހަބާ ކިޔައި، މިއީ ތާރީޚީ ގަރާރެއްކަމަށް ސިފަކޮށްފައެވެ. ސަބަބަކީ ކުރީގެ ގަރާރުތަކާ ޚިލާފަށް، މި ގަރާރުގައި އިސްރާއީލަށް ގޮވާލަނީ އެއްވެސް ޝަރުތަކާ ނުލައި 12 މަސް ދުވަހުގެ ތެރޭގައި މި ބިންތަކުން ފޭބުމަށެވެ.

އިސްރާއީލާއި އެމެރިކާ ވަނީ މި ގަރާރަށް ވަރަށް ބޮޑަށް ފާޑުކިޔައި ނުރުހުން ފާޅުކޮށްފައެވެ. ނަމަވެސް ތަޖުރިބާކާރުން ދެކޭގޮތުގައި މިއީ ބައިނަލްއަގްވާމީ ބައްދަލުވުންތަކާއި، ބައިނަލްއަގްވާމީ ގާނޫނީ ދާއިރާގައި އިސްރާއީލަށް ވާގިވެރިވާ ގައުމުތަކަށް ބޮޑު ގޮންޖެހުމަކަށް ވެގެންދާނެ ކަމެކެވެ.