ކުންފުނީގެ ގާނޫނަށް ގެނެވުނު އިސްލާހު ތަސްދީގުކުރައްވައިފި

ރައީސުލްޖުމުހޫރިއްޔާ ޑރ.މުހައްމަދު މުއިއްޒު

ކުންފުނިތަކުގެ ބޯޑަށް މެންބަރުން އައްޔަން ކުރުމަށް މިހާރު އޮންނަ މުއްދަތު ކުރުކުރަން ކުންފުނީގެ ގާނޫނަށް އިސްލާހު ގެނައުމުގެ ބިލު ރައީސް މުހައްމަދު މުއިއްޒު މިއަދު ތަސްދީގުކުރައްވައިފި އެވެ.

މި ބިލަކީ ރައްޔިތުންގެ މަޖިލީހުގެ ދައުރުން ބޭރުން އިއްޔެ ބޭއްވި ޖަލްސާގައި ފޭދޫ ދާއިރާގެ މެމްބަރު އިސްމާއިލް ނިޒާރު ސަރުކާރުގެ ފަރާތުން ހުށަހެޅުއްވި އިސްލާހެކެވެ.

މި އިސްލާހުގެ މައިގަނޑު މަޤްސަދަކީ ކުންފުނިތަކުގެ އާންމު ޖަލްސާތައް ބޭއްވުމަށް ނޯޓިސް ދޭން ޖެހޭ މުއްދަތު ކުރުކުރުމާއި، ކުންފުނިތަކުގެ ބޯޑަށް މެންބަރުން އައްޔަން ކުރުމަށް މިހާރު އޮންނަ މުއްދަތު ކުރުކުރުމެވެ. މި އިސްލާހުގެ ދަށުން، ހިއްސާދާރުންގެ ހާއްސަ އާންމު ޖަލްސާއަކަށް އެދި ހުށަހަޅުމަށްފަހު ތިން ދުވަހުގެ ތެރޭގައި ނޯޓިސް ފޮނުވަން ޖެހޭނެއެވެ. އަދި ޖަލްސާ ބާއްވަން އެދި ހުށަހަޅާތާ 10 ދުވަހުގެ ތެރޭގައި ޖަލްސާ ބާއްވަން ޖެހޭނެއެވެ.

އަމިއްލަ ކުންފުނިތަކާއި ޕަބްލިކް ކުންފުނިތަކުން ހާއްސަ އާންމު ޖަލްސާ ބާއްވަން ހަމަޖެހިފައިވާ ދުވަހުގެ މަދުވެގެން 7 ދުވަސް ކުރިން ނޯޓިސް ފޮނުވަން ޖެހޭނެއެވެ. މީގެ އިތުރުން، ޕަބްލިކް އަދި އަމިއްލަ ކުންފުނިތަކުގެ މެނޭޖިން ޑިރެކްޓަރުންނާއި ޑިރެކްޓަރުންގެ މަގާމު ހުސްވެއްޖެނަމަ، ރަޖިސްޓްރާ އޮފް ކޮމްޕެނީސްއިން އަންގާ ދުވަހުން ފެށިގެން 10 ދުވަހުގެ ތެރޭގައި އައު ޑިރެކްޓަރަކު އައްޔަންކުރަން ޖެހޭނެއެވެ.

މި އިސްލާހަށް އަމަލުކުރަން ފަށާނީ މިއަދުން ފެށިގެންނެވެ. މި ބަދަލުތަކުގެ ސަބަބުން ކުންފުނިތަކުގެ ހިންގުން އަވަސްވެ، ހަރުދަނާވެގެންދާނެ ކަމަށް ބެލެވެއެވެ.

ރައީސް ޑރ މުޙައްމަދު މުޢިއްޒު