ހަތަރު ތަނެއް ބަލައި ފާސްކޮށް ހަތް ބިދޭސީން އަތުލައިގެންފި

ހަތް ބިދޭސީއަކު އިމިގްރޭޝަނުން އަތުލައިގެންފި

އިމިގްރޭޝަން މޯލްޑިވްސްއިން މި މަހުގެ 16 ވަނަ ދުވަހު ހިންގި އޮޕަރޭޝަނެއްގައި މާލޭގެ 4 ތަނެއް ބަލައި ފާސްކޮށް، ގަވާއިދާ ޚިލާފަށް އުޅެމުންދިޔަ 7 ބިދޭސީން ވަނީ އަތުލައިގަނެފައެވެ.

އިމިގްރޭޝަނުން މަޢުލޫމާތު ދިންގޮތުގައި މި އޮޕަރޭޝަނުގައި ބަލައި ފާސްކުރި ތަންތަނުގެ ތެރޭގައި ދެ ގެއަކާއި ދެ ހޮޓަލެއް ހިމެނެއެވެ. މި ތަންތަނުން ފެނުނު 7 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ.

އިމިގްރޭޝަނުން އިތުރަށް ހާމަކުރިގޮތުގައި މި އޮޕަރޭޝަނަކީ އާންމު ސަލާމަތާއި ރައްކާތެރިކަމަށް ނުރައްކާވާފަދަ ގޮތަކަށް، ތޮއްޖެހިގެން ބިދޭސީން ދިރިއުޅެމުން އަންނަ އެކޮމޮޑޭޝަން ބްލޮކްތައް ބަލައި ފާސްކުރުމަށް ޓާސްކު ފޯހުން ހިންގަމުންދާ އޮޕަރޭޝަނުގެ ބައެކެވެ.

މި އޮޕަރޭޝަނުގެ މައިގަނޑު މަޤްޞަދަކީ ގަވާއިދާ ޚިލާފަށް ބިދޭސީން ދިރިއުޅޭ ތަންތަނާއި، މުޑުދާރުކޮށް ކާބޯތަކެތި ތައްޔާރުކުރާ ތަންތަން ހޯދައި، އެފަދަ ޙަރަކާތްތައް ހުއްޓުވުމެވެ. މިފަދަ އޮޕަރޭޝަންތަކުން ޤާނޫނާ ގަވާއިދާ ޚިލާފަށް ރާއްޖޭގައި ދިރިއުޅޭ ބިދޭސީންގެ މައްސަލަ ޙައްލުކުރުމަށް މަގުފަހިވާނެކަމަށް އިމިގްރޭޝަނުން އުންމީދުކުރެއެވެ.

އިމިގްރޭޝަނުން އާންމުންނަށް ގޮވާލާފައިވަނީ ގަވާއިދާ ޚިލާފަށް ބިދޭސީން ގެންގުޅޭ ފަރާތްތަކާއި، އެފަދަ ބިދޭސީންނަށް ހިޔާވަހިކަން ދޭ ފަރާތްތަކުގެ މަޢުލޫމާތު އެ މުއައްސަސާއަށް ހިއްސާކުރުމަށެވެ. މިކަމަކީ ޤައުމުގެ ސަލާމަތާއި ރައްކާތެރިކަމަށް މުހިންމު ކަމެއްކަމަށް އިމިގްރޭޝަނުން ބުނެފައިވެއެވެ.

އިމިގްރޭޝަން