ޗައިނާގެ ވެރިކަން ކުރާ ޕާޓީގެ ދައުވަތަކަށް ޕީއެންސީގެ މަތީ ފަންތީގެ ޓީމެއް ޗައިނާއަށް

ޗައިނާއަށް ޒިޔާރަތްކުރާ ޕީއެންސީގެ ޓީމް

ޗައިނާގެ ވެރިކަންކުރާ ކޮމިއުނިސްޓް ޕާޓީ އޮފް ޗައިނާ (ސީޕީސީ)ގެ އިންޓަނޭޝަނަލް ޑިޕާޓުމެންޓުގެ ދަޢުވަތަކަށް ކުރާ ދަތުރެއްގައި ރާއްޖޭގެ ވެރިކަންކުރާ ޕީޕަލްސް ނޭޝަނަލް ކޮންގުރެސް (ޕީއެންސީ) ޕާޓީގެ މަތީ ފަންތީގެ ޓީމެއް ޗައިނާއަށް ފުރައިފިއެވެ.

ޕީއެންސީގެ ފަރާތުން މި ދަތުރުގައި އެންމެ އިސްކޮށްކޮށް ހުންނެވީ ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީނެވެ. މި ދަތުރުގައި ކޮމިއުނިސްޓް ޕާޓީ އޮފް ޗައިނާގެ އިންޓަނޭޝަނަލް ޑިޕާޓުމެންޓުގެ މިނިސްޓަރ ލިއު ޖިންޗާއޯއާ ބައްދަލުކުރެއްވުމަށް ވަނީ ހަމަޖެހިފައެވެ.

ޕީއެންސީގެ ޓީމުން މި ދަތުރުގައި ޗައިނާގެ 5 ސިޓީއަކަށް ޒިޔާރަތްކުރާނެ ކަމަށް އެ ޕާޓީން މަޢުލޫމާތު ދީފައިވެއެވެ. މި ސިޓީތަކަށް ކުރާ ޒިޔާރަތުގައި އެ ސިޓީތަކުގެ ސީޕީސީގެ އިސްވެރިންނާ ބައްދަލުކޮށް، ދެ ޕާޓީގެ މެދުގައި ތަޖުރިބާ ހިއްސާކުރުމުުމުގެ އިތުރުން، އެ ސިޓީތަކުގެ ތަރައްޤީއަށް ކޮށްފައިވާ މަސައްކަތްތައް ބަލައި، ޗައިނާގެ ފަރާތުން އެ މަސައްކަތްތަކުގެ ތަޖުރިބާ ޙިއްސާކުރުން ކުރިއަށްދާނެއެވެ.

ޕީއެންސީން މަޢުލޫމާތު ދީފައިވާ ގޮތުގައި މި ދަތުރުގެ މައިގަނޑު މަޤުޞަދަކީ އިޤުތިޞާދީ ކުރިއެރުންތައް ޗައިނާއިން ހާސިލުކުރި ގޮތުގެ ތަޖުރިބާއިން ދަސްކުރެވެން ހުރި ކަންކަން ދަސްކުރުމާއި، ދެ ޕާޓީގެ މެދުގައި އޮތް ގުޅުން އިތުރަށް ބަދަހިކުރުމެވެ.

މި ދަތުރު ނިންމާލުމަށް ހަމަޖެހިފައިވަނީ މި މަހުގެ 26 ވަނަ ދުވަހުއެވެ.

ޕީއެންސީ ޗައިނާ