ހުޅުމާލޭގައި ގަވާއިދާ ޚިލާފަށް ޕާކުކޮށްފައި ހުރި އުޅަނދުތައް ޓޯކުރަން ފަށަނީ

ވެހިކަލްތައް ނެގުމުގެ މަސައްކަތް މާދަމާ ފަށަނީ

ހުޅުމާލޭގެ މަގުތަކާއި ގޯޅިތަކުގައި ގަވާއިދާ ޚިލާފަށް ގިނަ ދުވަސްވަންދެން ބަހައްޓާފައި ހުރި އުޅަނދުތައނދުތައް މާދަމާއިން ފެށިގެން ޓޯކުރަން ނިންމައިފިއެވެ.

ފުލުހުން މިއަދު އެކްސްގައި ކޮށްފައިވާ ޕޯސްޓެއްގައި ބުނެފައިވާ ގޮތުގައި، މި މަސައްކަތް ކުރިއަށް ގެންދާނީ ފުލުހުންނާއި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަދި ޓްރާންސްޕޯޓް މިނިސްޓްރީ ގުޅިގެންނެވެ. މި މަސައްކަތް ފެށުމަށް ހަމަޖެހިފައިވަނީ މާދަމާ ހެނދުނު 8:00 ގައެވެ.

ގަވާއިދާ ޚިލާފަށް ޕާކުކޮށްފައި ހުރި އުޅަނދުތައް ޓޯކުރުމުގެ އިތުރުން، އެފަދަ އުޅަނދުތައް އެހެން ސަރަހައްދުތަކަށް ބަދަލުކުރުމުގެ މަސައްކަތައްކަތްވެސް ކުރިއަށް ގެންދާނެ ކަމަށް ފުލުހުން މަޢުލޫމާތު ދީފައިވެއެވެ.

ފާހަގަކޮށްލެވޭ ގޮތުގައި، މަގުމަތީގައި ގިނަ ދުވަސްތަކެއް ވަންދެން ގަވާއިދާ ޚިލާފަށް އުޅަނދު ޕާކުކޮށްފައި ބޭއްވުމުގެ މައްސަލަ ބޮޑުވެގެން އާންމުން އަބަދުވެސް ޝަކުވާ ކުރަމުން އަންނަ ކަމެކެވެ. މިގޮތަށް ބަހައްޓާފައި ހުންނަ އުޅަނދުތަކުގެ ސަބަބުން މަގުގައި ދުއްވަން އޮންނަ ޖާގަ ކުޑަވެ، ހިނގާބިނގާވެ އުޅޭ މީހުންނަށް އުނދަގޫވެ، އެކްސިޑެންޓުގެ ރިސްކު އިތުރުވެގެންދެއެވެ.

ފަހަކަށް އައިސް އާދަޔާ ޚިލާފަށް އެކްސިޑެންޓުތައް ގިނަވުމާ ގުޅިގެން، މަގުތަކަކީ ރައްކާތެރި ތަންތަނަށް ހެދުމުގެ ގޮތުން ސަރުކާރުން ވަނީ ގިނަ މަސައްކަތްތަކެއް ފަށާފައެވެ. މީގެ ތެރޭގައި އެކްސިޑެންޓު ގިނަ ސަރަހައްދުތަކުގައި ފޯރިމެރުމާއި، ޗެކްޕޮއިންޓްތައް އިތުރުކުރުމާއި، ގަވާއިދުތަކާއި ޤާނޫނުތަކަށް ބަދަލު ގެނައުން ހިމެނެއެވެ..

އެޗްޑީސީ ފުލުހުން ހުޅުމާލެ