އިހަވަންދިއްޕޮޅުގައި އޮފްޝޯ ބަންކަރިން ފެށުމަށް ތައްޔާރު

އިހަވަންދިއްޕޮޅުގައި އޮފްޝޯ ބަންކަރިން ފެށުމަށް ވާންޖެހޭ ހުރިހާ ތައްޔާރީއެއް ވެނިމިއްޖެ ކަމަށް މޯލްޑިވްސް ޕޯޓްސް ލިމިޓެޑްގެ ސީއީއޯ މުހައްމަދު ވަޖީހު ވިދާޅުވެއްޖެ އެވެ.

ސީއީއޯ މުހައްމަދު ވަޖީހު މިކަން ހާމަކުރައްވާފައި ވަނީ މިއަދު ފޭސްބުކްގައި ކުރެއްވި ޕޯސްޓެއްގައެވެ.

ވަޖީހު ދެއްވި މަޢުލޫމާތުގައިވާ ގޮތުން، މި ހިދުމަތް ފެށުމަށް ބޭނުންވާ ބަންކަރިން ދެ ބޯޓާއި ޓަގު ބޯޓު އަދި ޕައިލެޓް ބޯޓު މިހާރު ވަނީ އިހަވަންދިއްޕޮޅަށް ގެންގޮސްފައެވެ. އަދި ބަންކަރިން ހިދުމަތް ދިނުމުގައި ހުންނަންޖެހޭ ޝަރުތެއް ކަމަށްވާ އވާ އިންޓަނޭޝަނަލް ޝިޕް އެންޑް ޕޯޓް ސެކިއުރިޓީ ގޭޓް (އައިއެސްޕީއެސް ގޭޓް) ވެސް ވަނީ ގާއިމްކޮށް ނިމިފައެވެ.

ބަންކަރިންގެ ހިދުމަތަކީ ގައުމުގެ އިގްތިސާދަށް ބޮޑު، އިންގިލާބީ ހެޔޮ ބަދަލުތަކެއް ގެނެސްދޭނެ ހިދުމަތެއްގެ ގޮތުގައި ސިފަކުރައްވާ، ވަޖީހު ވިދާޅުވީ މިއީ މިގައުމުގައި ކުރަންޖެހި ނަމަވެސް މިހާތަނާ ޖެހެންދެން ނުކުރެވި އޮތް ކަމެއް ކަމަށެވެ. އޭނާ އިތުރަށް ވިދާޅުވި ގޮތުގައި، ބަންކަރިން ހިދުމަތާއެކު އިންޓަނޭޝަނަލް ކަސްޓަމަރުންނަށް އިތުރު 14 ހިދުމަތެއް އެ ސަރަހައްދުން ފޯރުކޮށްދޭން ފެށޭނެއެވެ.

މި މަޝްރޫޢުގެ ސަބަބުން ސަރުކާރު ކުންފުނިތަކަށާއި އަމިއްލަ ކުންފުނިތަކަށް އަދި އަމިއްލަ ފަރުދުންނަށް އާމްދަނީ ހޯދުމުގެ ފުރުސަތު ފަހިވާނެ ކަމަށް ވަޖީހު ފާހަގަކުރެއްވިއެވެ. މީގެ އިތުރުން، އުތުރު މެރިޓައިމް ސާވިސަސްގެ ނަމުގައި ވެބްސައިޓެއް ގާއިމްކޮށް، އެ ސަރަހައްދުން ފޯރުކޮށްދޭ މެރިޓައިމް ދާއިރާގެ އެހެން ހިދުމަތްތަކުގެ މަޢުލޫމާތު ލިބޭނެ ގޮތް ހަދާފައިވާ ކަމަށް ވެސް އޭނާ ވިދާޅުވިއެވެ.

ބަންކަރިން މަޝްރޫޢުގެ ދެވަނަ ފިޔަވަހީގައި އޮއިލް ޓާމިނަލް އާއި އޮއިލް ޓޭންކުތައް ގާއިމްކުރުމުގެ މަސައްކަތް ފެށިގެންދާނެ ކަމަށް ވެސް ވަޖީހު ހާމަކުރެއްވިއެވެ.

ފާހަގަކޮށްލެވޭ ގޮތުގައި، އެސްޓީއޯ އާއި އެމްޕީއެލް ގުޅިގެން ރާއްޖޭގައި ބަންކަރިންގެ ހިދުމަތް މި މަހު ފަށަން ނިންމާފައިވާއިރު، އެ ހިދުމަތް ދިނުމަށް 'މެރިން އޭންޖަލް' އަދި 'މެރިން ބެލާ' ނަމަކަށް ކިޔާ ދެ ބޯޓު ބޭނުންކުރާނެއެވެ. މި ދެ ބޯޓު ވެސް މިހާރު ވަނީ އިހަވަންދިއްޕޮޅަށް ގެންގޮސްފައެވެ.

ރާއްޖޭގައި ފުރަތަމަ ފަށާނީ ފްލޯޓިން ބަންކަރިންގެ ހިދުމަތެވެ. ގާތްގަނޑަކަށް 4،000 ޓަނުގެ ތެޔޮ އުފުލޭނެ ދެ ބާޖު ބޭނުންކޮށްގެން ފަށާ މި ހިދުމަތާ އެކު މުސްތަގުބަލުގައި އެ ސަރަހައްދުގައި ސްޓޯރޭޖު ވެސް ގާއިމް ކުރާނެ ކަމަށް މަޢުލޫމާތު ލިބިފައިވެއެވެ.

އިހަވަންދިއްޕޮޅުގައި ބައިނަލްއަގްވާމީ ބަންކަރިން މަޝްރޫއެއް ހިންގުމަށްޓަކައި، އެސްޓީއޯއިން ހަކަތައިގެ ވިޔަފާރިކުރާ ދުނިޔޭގެ އެންމެ ބޮޑު އަމިއްލަ ކުންފުނި، ވިޓޯލްއާ އެކު އެމްއޯޔޫއެއްގައި ސޮއިކުރީ 13 މާޗު 2024ގައެވެ.

މި މަޝްރޫޢަކީ ރާއްޖޭގެ އިގްތިސާދަށް ބޮޑު ކުރިއެރުމެއް ގެނެސްދޭނެ ކަމެއްގެ ގޮތުގައި ބެލެވެއެވެ. އެއީ ރާއްޖޭގެ ބަނދަރުތަކުގައި ބޭރުގެ އުޅަނދުފަހަރަށް ތެޔޮ ވިއްކުމުމުގެ ފުރުސަތު ހުޅުވިގެންދާނެތީއެވެ. މިކަމުގެ ސަބަބުން ރާއްޖެއަށް ބޮޑު އާމްދަނީއެއް ލިބި، ވަޒީފާގެ ފުރުސަތުތައް އިތުރުވެގެންދާނެ ކަމަށް ވެސް ލަފާކުރެވެއެވެ.

މި މަޝްރޫޢު ފެށުމާއެކު، ރާއްޖެއަކީ ބައިނަލްއަގްވާމީ ކަނޑު ދަތުރުފަތުރުގެ ވިއުގައިގައި މުހިންމު ދައުރެއް އަދާކުރާ ގައުމަކަށް ވެގެންދާނެ ކަމަށް ބެލެވެއެވެ. މިއީ ރާއްޖޭގެ ޖިއޮގްރަފިކް ލޮކޭޝަންގެ ބޭނުން އެންމެ ފުރިހަމަ ގޮތުގައި ހިފުމަށް އެޅޭ މުހިންމު ފިޔަވަޅެއްގެ ގޮތުގައި ވެސް ފާހަގަކުރެވެއެވެ.