ރަފަހަށް އަރައިގެންފިނަމަ ހަތިޔާރު ދިނުން ހުއްޓާލާނަން

---

ފަލަސްތީނުގެ ގާޒާގެ ދެކުނުގައި އޮންނަ ރަފަހް ސިޓީއަށް އިޒްރޭލުން އަރައިގެންފިނަމަ އެގައުމަށް ހަތިޔާރު ދިނުން ހުއްޓާލާނެ ކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެ އެވެ.

އިޒްރޭލުން މިދިޔަ ހޯމަ ދުވަހުގެރޭ ރަފާހް އަށް ބޮން އަޅަން ފަށާފައިވާއިރު، އެގައުމުން ވަނީ ރަފަހަށް ވަންނަން އޮންނަ ބޯޑަރުތައް ވެސް ބަންދުކޮށްފަ އެވެ. އިޒްރޭލުން މީގެކުރިން ވަނީ ރަފަހްގައި މިލިޓަރީ އޮޕަރޭޝަނެއް ފަށަން ބޭނުންވާތީ އެ ސިޓީގައި ދިރިއުޅެމުންދާ އެންމެން ވަޒަން ދޫކޮށް ދިޔުމަށް ވެސް އަންގާފަ އެވެ. ނަމަވެސް މިކަން މިގޮތަށް ނުކުރުމަށް އިޒްރޭލަށް އެންމެ ބޮޑަށް ވާގިވެރިވާ އެމެރިކާ އިން ވެސް އެގައުމުގެ ކިބައިން ތަކުރާރުކޮށް ވަނީ އެދިފަ އެވެ.

އިޒްރޭލުގެ އަމަލުތަކާ ގުޅޭގޮތުން "ސީއެންއެން" އަށް ދެއްވި އިންޓަވިއުއެއްގައި ބައިޑެން ވިދާޅުވީ އިޒްރޭލުން ރަފަހަށް އަރައިގެންފިނަމަ އެމެރިކާ އިން އިޒްރޭލަށް ދެން ހަތިޔާރު ފޯރުކޮށްނުދޭނެކަން ވަރަށް ސާފުކޮށް އަންގާފައިވާނެ ކަމަށެވެ. އަދި އެމެރިކާ އިން މީގެކުރިން ފޯރުކޮށްދިން ހަތިޔާރުތައް ބޭނުން ކުރުމުގެ ސަބަބުން ގާޒާ އިން އެތައް ކުޑަކުދިންނެއް މަރުވެފައިވާ ކަމަށްވެސް ބައިޑެން ވިދާޅުވި އެވެ.

އެމެރިކާ އިން ދާދިފަހުން ވަނީ އިޒްރޭލަށް ފޮނުވުމަށް ހަމަޖެހިފައި އޮތް ބޮން ޝިޕްމެންޓެއް ފޮނުވުން ވެސް ވަގުތީ ގޮތުން މަޑުޖައްސާލާފަ އެވެ.

އިޒްރޭލުން ބުނީ ރަފާހް އަށް ދެމުންދާ ހަމަލާތައް އަމާޒުކުރަނީ ހަމާސް ޖަމާއަތުގެ ހަނގުރާމަވެރިން ތިބި ސަރަހައްދުތަކަށް ކަމަށެވެ. އަދި ހަމާސްގެ ބެލުމުގެ ދަށުގައި ތިބި އިޒްރޭލުގެ އަސީރުން ސަލާމަތް ކުރަން ކޮންމެހެން ވެސް ރަފަހްގައި އޮޕަރޭޝަނެއް ހިންގަންޖެހޭ ކަމަށްވެސް އިޒްރޭލުން ބުނެ އެވެ.

ޣައްޒާ