އޮގަސްޓް މަހު ދެ ބިލިއަން ރުފިޔާ އާއި ގާތްކުރާ އާމްދަނީއެއް މީރާއަށް ލިބިއްޖެ

އޮގަސްޓް މަހު ދައުލަތަށް ލިބުނު އާމްދަނީ 1.98 ބިލިއަން ރުފިޔާއަށް އަރާކަމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ހާމަކޮށްފިއެވެ.

މިއީ އަންދާޒާކުރި މިންވަރަށްވުރެ 34.5 އިންސައްތަ އިތުރު އަދަދެކެވެ. އަދި މިދިޔަ އަހަރުގެ މި މުއްދަތާ އަޅާބަލާއިރު 24 އިންސައްތައިގެ ކުރިއެރުމެކެވެ.

މި އާމްދަނީގެ ބޮޑު ބައެއް ހިއްސާކުރަނީ ޖީއެސްޓީންނެވެ. އެއީ 53.3 އިންސައްތަ ނުވަތަ 1.06 ބިލިއަން ރުފިޔާއެވެ. ދެން އެންމެ ބޮޑު ބައެއް ހިއްސާކުރަނީ އާމްދަނީން ނަގާ ޓެކުހުންނެވެ. އެއީ 23.9 އިންސައްތަ ނުވަތަ 472.66 މިލިއަން ރުފިޔާއެވެ.

އާމްދަނީ އިތުރުވި ސަބަބުތަކުގެ ތެރޭގައި ކުންފުނިތަކުގެ އާމްދަނީން ނަގާ ޓެކްސް، ގްރީން ޓެކްސް އަދި ޖީއެސްޓީ އިތުރުވުން ހިމެނެއެވެ. މީގެ އިތުރުން ފަތުރުވެރިކަމުގެ ދާއިރާއިން ލިބުނު އާމްދަނީވެސް އިތުރުވެފައިވާކަމަށް މީރާއިން ބުނެފައިވެއެވެ.

މީރާއިން އިތުރަށް ހާމަކުރި ގޮތުގައި، މިދިޔަ އަހަރުގެ ޖުލައި މަހާ އަޅާބަލާއިރު މިއަހަރުގެ ޖުލައި މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު 15 އިންސައްތަ އިތުރުވެފައިވެއެވެ. މިކަމުގެ ސަބަބުން ފަތުރުވެރިކަމުގެ ސިނާޢަތުން ލިބުނު އާމްދަނީ އިތުރުވެފައިވާކަމަށް މީރާއިން ފާހަގަކޮށްފައިވެއެވެ.

އަންދާޒާކުރި މިންވަރަށްވުރެ އާމްދަނީ އިތުރުވުމުގެ އިތުރު ސަބަބުތަކުގެ ތެރޭގައި ދައުލަތަށް ލިބިފައިވާ ކެޕިޓަލް ގެއިންސް ވިތުހޯލްޑިންގ ޓެކްސް އަދި ސުންގަޑި ހަމަވުމުގެ ފަހުން ބަލައިގަނެފައިވާ ޖީއެސްޓީ އާއި ރިސޯޓު ކުލި ހިމެނޭކަމަށްވެސް މީރާއިން ފާހަގަކޮށްފައިވެއެވެ.