ޕީޖީގެ މަޤާމަށް އައްބާސް ޝަރީފުގެ ނަން ހުށަހަޅައިފި

ރައީސް އޮފީހުގެ ލީގަލް ސެކްރެޓަރީ އައްބާސް ޝަރީފު ޕްރޮސެކިއުޓަރ ޖެނެރަލްގެ މަޤާމަށް އައްޔަން ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ހުށަހަޅުއްވާފިއެވެ.

އައްބާސްގެ ނަން ހުށަހަޅުއްވާފައި ވަނީ ދައުރުން ބޭރުގައި ރޭ ބޭއްވުނު ރައްޔިތުން މަޖިލިހުގެ ޖަލްސާގައެވެ.

ރޭ ބޭއްވުނު ދައުރުން ބޭރުގެ މަޖިލިސް ޖަލްސާގައި، މަޖިލީހުގެ އަމީން ޢާންމު ފާޠިމަތު ނިއުޝާ ވަނީ ރައީސުލްޖުމްހޫރިއްޔާ ފޮނުއްވި ސިޓީ އިއްވާފައެވެ. މި ސިޓީގައި ވިދާޅުވެފައިވަނީ މިދިޔަ މަހުގެ 22 ވަނަ ދުވަހު ޕްރޮސެކިއުޓަރ ޖެނެރަލްގެ މަޤާމު ހުސްވެފައިވާތީ، އެ މަޤާމަށް އައްބާސް ޝަރީފުގެ ނަން ހުށަހަޅުއްވާ ކަމަށެވެ.

މި މަޤާމަށް ކުރިމަތިލެއްވި އެހެން ފަރާތްތަކުގެ ތެރޭގައި މަރްޔަމް ނިހާޔަތު، އަޙްމަދު ހައިލަމް، ޢަލީ ސަމީރު، އަޙްމަދު ޔާމީން އަދި އިބްރާހީމް ޢަލީ ހިމެނެއެވެ.

މަޖިލީހުގެ ރައީސް އަބްބްދުއްރަހީމް އަބްދުﷲ ވަނީ މި މައްސަލަ ދިރާސާކުރުމަށް ޖުޑިޝަރީ ކޮމިޓީއަށް ފޮނުއްވާފައެވެ. މި މަސައްކަތް ނިންމުމަށް ރޭ 9:30 ގައި ޖުޑިޝަރީ ކޮމިޓީގެ ބައްދަލުވުމެއް ބޭއްވުމަށް ވެސް ވަނީ އެޖެންޑާ ކުރެވިފައެވެ.

އައްބާސް ޝަރީފަކީ ޤާނޫނީ ދާއިރާއިން މަތީ ތަޢުލީމު ހާސިލުކުރައްވާފައިވާ، ތަޖުރިބާކާރު ވަކީލެކެވެ. އޭނާ ވަނީ ކުރީގެ ދެ ރައީސުންގެ ވަކީލުކަން ކުރައްވާ އަދި ހައިކޯޓުގެ ފަނޑިޔާރުކަން ވެސް ކުރައްވާފައެވެ.

މިހާތަނަށް ރާއްޖޭގެ އެއްވެސް ޕްރޮސެކިއުޓަރ ޖެނެރަލަކަށް ފަސް އަހަރުގެ ދައުރު ފުރިހަމަ ކުރެވިފައެއް ނުވެއެވެ.