ޑޮކްޓަރީ ބޭހުގެ އަގު ބޮޑުކަމުން ފިޔަވަޅު އަޅަން ރައީސް އަންގަވައިފި

ރައީސް ޑރ.މުހައްމަދު މުއިއްޒު / ފޮޓޯ:ރައީސް އޮފީސް

ރާއްޖެ އެތެރެކުރާ ޑޮކްޓަރީ ބޭސް ވިއްކާ އަގުތައް ހުރީ %200 އިންސައްތައިން ފެށިގެން %2000 އިންސައްތައަށް ބޮޑުކޮށް ކަމަށް ފާހަގަކޮށް، އެކަން ހުއްޓުވަން ފިޔަވަޅުތައް އަޅަން ރައީސް މުހައްމަދު މުއިއްޒު ސަރުކާރުގެ އިދާރާތަކަށް މިއަދު އަންގަވައިފި އެވެ.

ރައީސް މުއިއްޒު މިކަން ހާމަކުރައްވާ އެކްސްގައި ވިދާޅުވެފައިވަނީ ޑޮކްޓަރީ ބޭސް ރާއްޖެ އެތެރެކޮށް ވިއްކާ އަގުތައް ރާއްޖޭގެ ބާޒާރުގައި މިހާތަނަށް ހުރީ %200 އިންސައްތައިން ފެށިގެން %2000 އިންސައްތައާ ދެމެދުގެ ފައިދާއެއް ނަގާ މިންވަރުގައި ކަމަށެވެ.

"ބޭސް ވިއްކުމުގައި މި ވަރުގެ ބޮޑު ފައިދާ ނެގުން ހުއްޓުވުމަށްޓަކައި އަޅަން ޖެހޭ ފިޔަވަޅުތައް އެޅުމަށް ކަމާ ގުޅުން ހުރި އެންމެހައި މުއައްސަސާތަކަށް މިހާރު ވާނީ އަންގާފައި" ރައީސް އިތުރަށް ވިދާޅުވެފައި ވެއެވެ.

ރައީސްގެ ޕޯސްޓުގައި ވިދާޅުވި ގޮތުގައި މި އަޅާ ފިޔަވަޅުތަކާ އެކު ބޭހުގެ ބާޒާރުގެ އަގާއި އާސަންދައިން ދައްކަން ޖެހޭ އަގު ވެސް ދަށްކުރެވޭނެ އެވެ. މި ބަދަލު ގެންނަން ހަމަޖެހިފައިވާ ތާވަލާއި އިތުރު ތަފްސީލުތައް ވަރަށް އަވަހަށް އިއުލާންކުރައްވާނެ ކަމަށް ވެސް އެމަނިކުފާނު ވިދާޅުވި އެވެ.

"މި ބަދަލުގެ ނަތީޖާއެއްގެ ގޮތުން، އާސަންދައިން އިސްރާފުވަމުންދާ ގިނަ އަދަދެއްގެ ފައިސާ (އެތައް ސަތޭކަ މިލިއަން ރުފިޔާ) ސަލާމަތްކުރެވި، ސިއްހީ ހިދުމަތުގެ ފެންވަރު މަތިކުރުމަށް އެ ފައިސާ ބޭނުންކުރެވޭނެ މަގު ތަނަވަސްވެގެންދާނެ" ރައީސް އިތުރަށް ވިދާޅުވެފައި ވެއެވެ.

ރައީސް ޑރ މުޙައްމަދު މުޢިއްޒު