މޫޑީސްއިން ރާއްޖޭގެ ކްރެޑިޓް ރޭޓިން ސީއޭއޭ-2 އަށް ބަދަލުކޮށްފި

މޫޑިސް

ދުނިޔޭގެ ނަން މަޝްހޫރު ކްރެޑިޓް ރޭޓިން އެޖެންސީ، މޫޑީސްއިން ދިވެހިރާއްޖޭގެ ކްރެޑިޓް ރޭޓިން ސީއޭއޭ-1 އިން ސީއޭއޭ-2 އަށް ބަދަލުކޮށްފިއެވެ.

މިކަން ހާމަކޮށްފައި ވަނީ މޫޑީސްއިން މިއަދު ނެރުނު ބަޔާނެއްގައި ބުނެފައިވެއެވެ.

މޫޑީސްއިން ރާއްޖޭގެ ރޭޓިން ދަށްކުރި މައިގަނޑު ސަބަބަކީ ކުރިއަށް އޮތް 12-18 މަސްދުވަހުގެ ތެރޭގައި ރާއްޖެއިން ދައްކަންޖެހޭ ބޭރު ދަރަނި ދެއްކޭނެ ވަރުގެ މާލީ ގާބިލްކަން ރާއްޖޭގައި ހުރިކަމަށް އެ އެޖެންސީއަށް ގަބޫލުނުކުރެވުމެވެ. އެ އެޖެންސީން ފާހަގަކޮށްފައިވާ ގޮތުގައި ރާއްޖޭގެ ބޭރު ފައިސާގެ ރިޒާވް ވަރަށް ބޮޑަށް ދަށަށް ގޮސްފައިވާއިރު، ސޮވަރިން ފަންޑުގައި ވެސް ދަރަނި އަދާކުރެވޭނެ މިންވަރަށް ފައިސާ ނެތްކަން ފާހަގަކޮށްފައިވެއެވެ.

މީގެ އިތުރުން، މި އަހަރުގެ ބަޖެޓް ޑެފިސިޓް ވަރަށް ބޮޑުވެފައިވާއިރު، އެ ޑެފިސިޓް ފޫބައްދަން ކުރު މުއްދަތުގައި ދައްކާ ދަރަނިތައް ނަގަން ޖެހިފައިވުމުން ރިޒާވަށް ނޭދެވޭ އަސަރުކުރާނެކަމަށް މޫޑީސްއިން ބުނެފައިވެއެވެ. އަދި ހަރަދު ކުޑަކުރަން ފިޔަވަޅުތައް އެޅުން ލަސްވަމުން ދިޔުމަކީ ވެސް ކަންބޮޑުވާ ކަމެއްގެ ގޮތުގައި ފާހަގަކޮށްފައިވެއެވެ.

މޫޑީސްއިން ބުނެފައިވާ ގޮތުގައި ބޭރު ފަރާތްތަކުން ރާއްޖެއަށް މާލީ އެހީތެރިކަން ނުލިބިއްޖެ ނަމަ ކުރު މުއްދަތުގައި ރާއްޖޭގެ މާލީ ހާލަތު އިތުރަށް ނާޒުކު ފައްތަރަކަށް ދާނެ ކަމަށް ލަފާކުރފާކުރެވެއެވެ.

މޫޑީސްގެ މި ނިންމުމާއެކު، ދުނިޔޭގެ ބޮޑެތި ކްރެޑިޓް ރޭޓިން އެޖެންސީތަކުން ރާއްޖޭގެ ރޭޓިން ދަށްކުރަމުންދާކަން ފާހަގަކުރެވެއެވެ. މީގެ ކުރިން ފިޗް ރޭޓިންސްއިން ވެސް ވަނީ ރާއްޖޭގެ ރޭޓިން 'ސީސީސީ ޕްލަސް' އިން 'ސީސީ'އަށް ދަށްކޮށްފައެވެ.

މޫޑިސް