ގައުމީ އެތުލީޓުންނާއި އޮފިޝަލުންނަށް އިންޝުއަރެންސް ދޭން ނިންމައިފި

ޤައުމީ އެތުލީޓުންނަށް އިންސުއަރެންސްދެނީ

ގައުމީ ފެންވަރުގެ އެތުލީޓުންނާއި އޮފިޝަލުންނަށް އަންނަ އަހަރުން ފެށިގެން ހެލްތު އިންޝުއަރެންސް ދޭން ސަރުކާރުން ނިންމައިފި އެވެ.

މިކަން އިއުލާނު ކުރެއްވީ މިއަދު ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައި ސްޕޯޓްސް މިނިސްޓަރު އަބްދުﷲ ރާފިއު އެވެ.

ކުޅިވަރުގެ ދާއިރާއިން ކުރަމުންދާ މަސައްކަތްތަކާ ބެހޭ މައުލޫމާތު ހިއްސާކުރެއްވުމަށް ބޭއްވުނު މި ބައްދަލުވުމުގައި މިނިސްޓަރު ރާފިއު ވިދާޅުވީ ކުޅުންތެރިންނާއި އޮފިޝަލުންގެ އިންޝުއަރެންސަށް ބޭނުންވާ ފައިސާ އަންނަ އަހަރުގެ ބަޖެޓުގައި ހިމެނުމަށް ވެސް މިހާރު ހުށަހަޅާފައިވާ ކަމަށެވެ.

"ﷲ އިރާދަކުރެއްވިއްޔާ އަޅުގަނޑުމެންގެ ނެޝަނަލް އެތުލީޓުންނާއި އޮފިޝަލުންނަށް އިންޝުއަރެންސްގެ ކަންތައް އަންނަ އަހަރު ހަމަޖެހިގެންދާނެ ވާހަކަ ވެސް މި ފުރުސަތުގައި ދަންނަވާލަން،" މިނިސްޓަރު ވިދާޅުވި އެވެ.

ނަމަވެސް މި ނިންމުމާ ބެހޭ އިތުރު ތަފްސީލެއް މިނިސްޓަރު ހާމަކުރައްވާފައެއް ނުވެ އެވެ. އެހެންކަމުން، މި އިންޝުއަރެންސްގެ ދަށުން ލިބޭނެ ޚިދުމަތްތަކާއި، މީގެ ދަށުން ހިމެނޭނެ ކުޅުންތެރިންނާއި އޮފިޝަލުންގެ ޝަރުތުތަކާ ބެހޭ މައުލޫމާތު އަދި ސާފުވެފައެއް ނުވެ އެވެ.

ފާހަގަކޮށްލެވޭ ގޮތުގައި، ބައިނަލްއަގުވާމީ ގިނަ މުބާރާތްތަކުގައި ދިވެހި އެތުލީޓުން ރާއްޖެ ތަމްސީލްކުރަމުންދާ އިރު، އެފަދަ ކުޅުންތެރިންނަށާއި އެކުޅުންތެރިންނާ އެކު ދާ އޮފިޝަލުންނަށް މިހާތަނަށް ސަރުކާރުގެ ފަރާތުން އިންޝުއަރެންސެއް ނުލިބެ އެވެ. މި ނިންމުމަކީ ގައުމީ ފެންވަރުގެ ކުޅުންތެރިންނާއި އޮފިޝަލުންނަށް ލިބިގެންދާނެ ބޮޑު ކުރިއެރުމެއް ކަމަށް ބެލެވެ އެވެ.

ކުޅިވަރާއި ބެހޭ ވުޒާރާ