ބަންކަރިންގެ ފުރަތަމަ ބޯޓް ކުޅުދުއްފުށީގައި، ދެވަނަ ބޯޓް ރާއްޖެއައުމަށް ދަތުރު ކުރަނީ

ރާއްޖޭގައި ބަންކަރިންގެ ޚިދުމަތް ދިނުމަށް ގެންނަ ދެ ބޯޓުގެ ތެރެއިން އެއް ބޯޓު، މެރިން އެންޖަލް، ހދ. ކުޅުދުއްފުށީ ޕޯޓުގައި ބަނދަރު ކޮށްފިއެވެ.

މި ބޯޓު މިހާރު ކުޅުދުއްފުށީ ބަނދަރު ބޭރުގައި އޮތް އިރު، ދެވަނަ ބޯޓު ކަމުގައިވާ މެރިން ބެލާ މިހާރު ރާއްޖެއަށް ދަތުރުކުރަމުންދެއެވެ.

އެސްޓީއޯ އާއި އެމްޕީއެލް ގުޅިގެން ރާއްޖޭގައި ބަންކަރިންގެ ޚިދުމަތް މި މަހު ފަށަން ނިންމާފައިވާއިރު، މި ޚިދުމަތް ދިނުމަށް ދެ ބޯޓު ބޭނުންކުރާނެއެވެ. ރާއްޖޭގެ އެންމެ އުތުރުގައި އިންޓަނޭޝަނަލް ބަންކަރިން ޚިދުމަތާއެކު، މެރިޓައިމްގެ އިތުރު ޚިދުމަތްތައްވެސް ދޭން ވަނީ ނިންމާފައެވެ. މިގޮތުން އެސްޓީއޯއިން އޮފްޝޯ ބަންކަރިން ޚިދުމަތް ފޯރުކޮށްދޭއިރު، އެމްޕީއެލްއިން ޕައިލަޓޭޖާއި މެރިޓައިމްގެ އެހެން ޚިދުމަތްތައް ދޭނެއެވެ.

މި މަހު ފަށާ މި ޚިދުމަތާއެކު ފުރަތަމަ ފަށާނީ ފްލޯޓިން ބަންކަރިންގެ ޚިދުމަތެވެ. ގާތްގަނޑަކަށް 4،000 ޓަނުގެ ތެޔޮ އުފުލޭނެ ދެ ބާޖު ބޭނުންކޮށްގެން ފަށާ ޚިދުމަތާއެކު މުސްތަޤުބަލުގައި އެ ސަރަހައްދުގައި ސްޓޯރޭޖުވެސް ޤާއިމްކުރާނެއެވެ.

އުތުރުގެ ސަރަހައްދަކީ ބައިނަލްއަޤްވާމީ ކަނޑު ދަތުރުތަކުގައި މުހިންމު ސަރަހައްދަކަށްވާއިރު، އުތުރުގައި ބަންކަރިންއާއި މެރިޓައިމްގެ ޚިދުމަތްތައް ފޯރުކޮށްދޭން ފެށުމަކީ ރާއްޖެއަށް ބޮޑު ފައިދާއެއް ކުރާނެ ކަމެއް ކަމަށް ސަރުކާރުން ބުނެއެވެ.

އިހަވަންދިއްޕޮޅުގައި ބައިނަލްއަޤްވާމީ ބަންކަރިން މަޝްރޫޢެއް ހިންގުމަށް އެސްޓީއޯއިން ހަކަތައިގެ ވިޔަފާރިކުރާ ދުނިޔޭގެ އެންމެ ބޮޑު އަމިއްލަ ކުންފުނި، ވިޓޯލްއާ އެކު އެމްއޯޔޫއެއްގައި ސޮއިކުރީ 13 މާޗު 2024 ގައެވެ. މި މަޝްރޫޢާއެކު ރާއްޖޭގެ އުތުރުގައި ބަންކަރިންގެ ޚިދުމަތް ފެށުމަކީ ރާއްޖޭގެ އިޤްތިޞާދަށް އައު ހަކަތައެއް ލިބިގެންދާނެ ކަމެއް ކަމަށް ބެލެވެއެވެ.