އެމްޕީއެލްގެ އަމާޒަކީ ސަރުކާރަަށް ބަރޯސާނުވެ އާމްދަނީ އިތުރު ކުރުން!

ކުންފުނިން ސަރުކާރަށް ބަރޯސާ ނުވެ އާމްދަނީ އިތުރުކުރުމަށް އާ ޕްލޭންތަކެއް އެކުލަވާލަވާލާފައިވާއިވާ ކަމަށް އެމްޕީއެލްގެ.ސީއީއޯ މުހައްމަދު ވަޖީހު އިބުރާހިމް ވިދާޅުވެއްޖެއެވެ.

އިހަވަންދިއްޕޮޅުގައި އިންޓަނޭޝަނަލް ބަންކަރިންގެ ހިދުމަތް ހިމެނޭ ގޮތަށް މެރިޓައިމް އަދި އޯޕީއެލް (އޮފް ޕޯޓް ލިމިޓްސް) ސާވިސަސް ފޯރުކޮށްދިނުމުގެ މަސައްކަތް މި މަސް ތެރޭގައި ފަށާނެއެވެ.

މެރިޓައިމް އަދި އޯޕީއެލްގެ ހިދުމަތް ގުޅިގެން ފޯރުކޮށްދިނުމުގެ ގޮތުން އެމްޕީއެލް އާއި އެސްޓީއޯއާ ދެމެދު އެމްއޯޔޫއެއްގައި ވަނީ ސޮއިވެސް ކޮށްފައެވެ.

މެރިޓައިމް ދާއިރާގެ އިސްފަރާތްތަކާއެކު އެމްޕީއެލުގައި ބޭއްވި ބައްދަލުވުމެއްގައި ވަޖީހު ވިދާޅުވި ގޮތުގައި، އެމްޕީއެލްއިން ކުރިމަގަށް ރާވާފައިވާ ގިނަ ޕްރޮޖެކްޓުތަކަކީ މެރިޓައިމް ދާއިރާއާ ގުޅުން ހުރި ކަންކަން ކަމަށެވެ. މިއާއެކު މި ދާއިރާގެ އިސްފަރާތްތަކުގެ މަޝްވަރާއާއި ޚިޔާލު ވަރަށް މުހިންމު ކަމަށް އޭނާ ވިދާޅުވިއެވެ.

"އަޅުގަނޑުމެން ކުރިއަށް ރާވާފައި ހުރި މަސައްކަތްތަކާ ގުޅޭ ގޮތުން މެރިޓައިމް ދާއިރާގެ އިސްފަރާތްތަކުގެ ޚިޔާލު ހޯދުމަކީ ވަރަށް މުހިންމު ކަމެއް، ހަމައެއާއެކު މިއަދަކީ އަޅުގަނޑު ވަރަށް އުފާވާ ދުވަހެއް ސަބަބަކީ މި ކަމުގެ މީހުންނާއި އެކު ބައްދަލުކޮށް މަޝްވަރާ ކުރެވޭތީ،". ވަޖީހު ވިދާޅުވިއެވެ.

އެމްޕީއެލްއިން މިއަދު ބޭއްވި ބައްދަލުވުމުގައި، މެރިޓައިމް ދާއިރާގެ ސްޓޭކްހޯލްޑަރުން ވަނީ މި ދާއިރާ އިތުރަށް ތަރައްގީ ކުރުމުގެ މުހިންމުކަން ފާހަގަކުރައްވާފައެވެ. މި ބައްދަލުވުމުގައި މެރިޓައިމް ދާއިރާއާ ގުޅުންހުރި ހަރަކާތްތައް އިތުރުކުރުމަށާއި، މި މަސައްކަތްތައް ދެމެހެއްޓެނިވި ގޮތެއްގައި ކުރިއަށް ގެންދިއުމުގެ މުހިންމުކަމަށް އެ ޞޭފުޅުން ވިދާޅުވިއެވެ.

މެރިޓައިމް ދާއިރާގެ އިސް ފަރާތްތަކުން ވަނީ އެ ދާއިރާއާ ގުޅޭ ގޮތުން ހުރި ކަންބޮޑުވުންތައް ފާހަގަކޮށްފައެވެ. މީގެ ތެރޭގައި ތަމްރީނުވެފައިވާ މުވައްޒަފުންގެ ދަތިކަމާއި، ޒަމާނީ ވަސީލަތްތަކުގެ މަދުކަންވެސް ފާހަގަ ކުރައްވައިފައެވެ.