ވެމްކޯ އިން ކުނި މެނޭޖުކުރަން އިތުރު ތަނެއް ހޯދަނީ

ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ކުނި މެނޭޖުކުރުމަމަށް ތިލަފުށި ނޫން އެހެން ތަނެއް ހޯދުމަށް މަސައްކަތް ކުރަމުންދާ ކަމަށް އެ ކުންފުނީގެ މެނޭޖިންގ ޑިރެކްޓަރ މުޖުތަބާ ޖަލީލް ވިދާޅުވެއްޖެ އެވެ.

މުޖުތަބާ މިހެން ވިދާޅުވީ ދައުލަތުގެ މީޑިއާ ޕީއެސްއެމް ނިއުސްގެ “ރާއްޖެމިއަދު” ޕްރޮގްރާމްގައި ވެމްކޯގެ ޚިދުމަތްތަކާ ގުޅޭގޮތުން ވާހަކަދައްކަވަމުންނެވެ.

މުޖުތަބާ ވިދާޅުވި ގޮތުގައި، މިހާރު ތިލަފުށީގައި ކުނި އަޅާ ސަރަހައްދު ވަނީ ފުރިފަ އެވެ. އެގޮތުން، ތިލަފުށީގައި ކުނި އަޅާ ސަރަހައްދުގައި މިހާރު 47 މީޓަރުގެ އުސްމިނަށް ކުނި ނަގާފައިވާއިރު، އެންމެ މައްޗަށް ކުނި ނެގޭނެ ކަމަށް އަންދާޒާކޮށްފައިވަނީ 50 މީޓަރަށް ކަމަށް އޭނާ ވިދާޅުވިއެވެ.

“އެހެންވީމަ އަނެއްހެން ވަރަށް ރިސްކީ ލެވެލްއެއްގައި އޮތް ތަނެއް. ކޮންމެ ދުވަހަކުވެސް މެނޭޖްކޮށްގެން ކުރިއަށް މި ގެންދަނީ،” މުޖުތަބާ ވިދާޅުވިއެވެ.

މުޅި ރާއްޖޭގައި އުފައްދާ ކުނީގެ 90 އިންސައްތަ ތިލަފުއްޓަށް ގެންދަން ޖެހޭކަމަށް މުޖުތަބާ ފާހަގަކުރެއްވިއެވެ. އަދި މާލެ ސަރަހައްދަކީ ރާއްޖޭގައި އެންމެ ގިނައިން ކުނި އުފައްދާ ސަރަހައްދު ކަމަށްވާތީ، މާލެ ކައިރިން ކުނި މެނޭޖުކުރާނެ ތަނެއް ހަމަޖެއްސުމަކީ މުހިންމު ކަމެއް ކަމުގައި އޭނާ ވިދާޅުވި އެވެ.

މީގެއިތުރުން، މިހާރުގެ ސަރުކާރު ހަވާލުވިއިރު ވެމްކޯގައި ދަރަނީގެ ގޮތުގައި 160 މިލިއަން ރުފިޔާ އޮތް ކަމަށާއި، މިހާރު އެންމެ ބޮޑު އަމާޒަކީ ދަރަނިން ސަލާމަތްވެ ކުންފުނިން ފޯރުކޮށްދޭ ޚިދުމަތްތައް މެދުކެނޑުމެއް ނެތި ކުރިއަށް ގެންދިއުން ކަމަށްވެސް މުޖުތަބާ ވިދާޅުވިއެވެ.