ޓްރަމްޕްގެ މައްސަލައިގެ ހުކުމް އިންތިޚާބަށްފަހު އިއްވަން ނިންމައިފި

އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ މައްޗަށް އުފުލިފައިވާ ދަޢުވާތަކުގެ ހުކުމް، އެ ގައުމުގެ ރިޔާސީ އިންތިޚާބަށްފަހު އިއްވަން ނިންމައިފިއެވެ.

މި މައްސަލަ ބައްލަވާ ނިއު ޔޯކުގެ ފަނޑިޔާރު ހުއާން މާޗަން ވިދާޅުވީ، ހުކުމް އިއްވާނީ ނޮވެމްބަރު 26 ގައި ކަމަށެވެ.

މި މައްސަލައިގައި ޓްރަމްޕްގެ މައްޗަށް 34 ދަޢުވާއެއް ސާބިތުވެފައިވެއެވެ. މީގެ ތެރޭގައި 2016 ގެ ރިޔާސީ އިންތިޚާބުގެ ކުރިން އަންހެނަކަށް ފައިސާ ދީގެން އެ ވާހަކަ އޮއްބާލަން މަސައްކަތްކުރި ކަމުގެ ދަޢުވާ ހިމެނެއެވެ.

ފަނޑިޔާރު މާޗަން ވިދާޅުވީ، ހުކުމް ފަސްކުރަނީ އިންތިޚާބަށް އަސަރުކޮށްފާނެ ކަމަށް ޝައްކުކުރުމުގެ ފުރުސަތު ނުދިނުމަށް ކަމަށެވެ. ޓްރަމްޕް ވަނީ މި ނިންމުމަށް މަރުހަބާ ކިޔުއްވައި، އޭނާގެ ކުށެއް ނެތް ކަމަށް ވިދާޅުވެފައެވެ.

ކުރިއަށް އޮތް ރިޔާސީ އިންތިޚާބުގައި ޓްރަމްޕްއާ ވާދަކުރައްވަނީ ޑިމޮކްރެޓިކް ޕާޓީގެ ކެންޑިޑޭޓް، ނައިބު ރައީސް ކަމަލާ ހެރިސްއެވެ.