ހުޅުމާލޭގައި ހިނގި މަރުގެ އެކްސިޑެންޓު: ސްޕޯޓްސް ކާރު ދުއްވި ފަރާތް ޝަރީއަތް ނިމެންދެން ބަންދު

ކާރުދުއްވި ފަރާތް / ފޮޓޯ:ޕޮލިސް

ރޭ ދަންވަރު ހުޅުމާލޭގައި ހިނގި މަރުގެ އެކްސިޑެންޓެއްގައި ސްޕޯޓްސް ކާރު ދުއްވަން އިން މުހައްމަދު ވިސާމް ސިދުގީ ޝަރީއަތް ނިމެންދެން ބަންދުގައި ބެހެއްޓުމަށް ކޯޓުން އަމުރުކޮށްފިއެވެ.

މި އެކްސިޑެންޓު ހިނގާފައިވަނީ ރޭ ދަންވަރު 2:00 އާއި ހާއިރު ހުޅުމާލޭ ސެންޓްރަލް ޕާކް ކައިރިން، އުރީދޫ އޮފީސް އިމާރާތް ކުރިމަތީގައި ކާރަކާއި ސައިކަލެއް ޖެހިގެންނެވެ. މި ހާދިސާގައި ސައިކަލުގައި އިން 23 އަހަރުގެ ހަސަން ސަމާހު ވަނީ ހުޅުމާލޭ ހޮސްޕިޓަލުގައި ފަރުވާދެމުން ދަނިކޮށް ނިޔާވެފައެވެ.

ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ، އެކްސިޑެންޓުގައި ކާރު ދުއްވަން އިން ވައިލެޓްފެހި/ސ. ހިތަދޫ، މުހައްމަދު ވިސާމް ސިދުގީ ހައްޔަރުކޮށް، އޭނާގެ ބަންދާ މެދު ގޮތެއް ނިންމުމަށް ކޯޓަށް މިއަދު ހާޒިރުކުރުމުން ޝަރީއަތް ނިމެންދެން ބަންދުގައި ބެހެއްޓުމަށް ގާޒީ އަމުރުކޮށްފައިވާ ކަމަށެވެ. އަދި އޭނާގެ ވަނަވަރު ފުލުހުން މިއަދު އާންމުކޮށްފައިވެއެވެ.

މި އެކްސިޑެންޓުގައި މަރުވި ސަމާހުގެ ބޮލާއި މޫނުމައްޗަށް ބޮޑެތި އަނިޔާތަކެއް ލިބުނު ކަމަށާއި، އޭނާ ނިޔާވެފައި ވަނީ ހުޅުމާލޭ ހޮސްޕިޓަލަށް ގެންދިޔަތާ ކުޑަ އިރުކޮޅެއްގެ ތެރޭގައި ކަމަށް އެނގިފައިވެއެވެ.

މި ހާދިސާއާ ގުޅިގެން، ސަރުކާރުން ވަނީ ބާރަށް ދުއްވާ މީހުންނާ މެދު ފިޔަވަޅު އެޅުމަށް ގާނޫނުތައް އިސްލާހު ކުރުމަށް ނިންމާފައެވެ. މިފަދަ ހާދިސާތައް ތަކުރާރުވިޔަ ނުދިނުމަށް އަޅަންޖެހޭ ފިޔަވަޅުތައް އެޅުމަށް ކަމާބެހޭ އިދާރާތަކުން މަސައްކަތް ފަށާފައިވާ ކަމަށް ވެސް މަޢުލޫމާތު ލިބިފައިވެއެވެ.

ފުލުހުން އެކްސިޑެންޓް