ކުރިއަށް އޮތް ފަތުރުވެރިކަމުގެ ޕީކް ސީޒަނަށް އެމްއޭސީއެލް ތައްޔާރުވަނީ

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ޓޫރިޒަމްގެ ޕީކް ސީޒަނަށް ތައްޔާރުވާން ފަށައިފިއެވެ.

މިގޮތުން އެ ކުންފުނީގެ ފެސިލިޓީސް މެނޭޖްމަންޓް އެންޑް ޔުޓިލިޓީސް ޑިވިޒަނުން 'ވިންޓަރ ޕްރެޕް ކިކްއޮފް 2024' ގެ ނަމުގައި ޚާއްސަ އިވެންޓެއް ބާއްވާފައިވެއެވެ.

މި ތައްޔާރީތަކުގައި އިސްކަންދެނީ ފަސިންޖަރުންނާއި އެއަރލައިންތަކަށް ފަސޭހަ ޚިދުމަތްތަކެއް ދިނުމަށެވެ. މިގޮތުން ޓާމިނަލް ސަރަހައްދު ތަނަވަސްކޮށް، ކާރުބާރޫ ކުޑަކުރުމާއި، ފިނިހޫނުމިން ބެލެހެއްޓުމާއި، ޓާމިނަލް ރީތިކުރުމަށް މަސައްކަތްކުރާނެއެވެ.

އެމްއޭސީއެލްގެ ސީއީއޯ އިބްރާހީމް ޝަރީފް މުޙައްމަދު ވިދާޅުވެފައިވަނީ މިއީ ރޭވިފައިވާ މަސައްކަތުގެ ފެށުމެއް ކަމަށާއި، އަންނަ އަހަރުގެ ސީޒަނަށް ލަނޑުދަނޑިތަކެއް ކަނޑައަޅައި، ގޮންޖެހުންތަކަށް ހައްލު ހޯދައި، އެއަރޕޯޓުގެ ޚިދުމަތްތައް އިތުރަށް ރަނގަޅުކުރާނެ ކަމަށެވެ. އަދި ކުންފުނީގެ އެތެރޭގައި ކުރެވޭ މަސައްކަތްތައް މުވައްޒަފުންގެ މެދުގައި މަޝްވަރާކުރެވިގެން ކުރިއަށް ގެންދާތީ އެކަމަށް ތައުރީފު ވެސް ކުރައްވާފައިވެއެވެ.

ވެލާނާ އިންޓަނޭޝަނަލް އެއަރޕޯޓަކީ ވިންޓަރ ސީޒަނުގައި މުޅި ދުނިޔޭގައި ވެސް އެންމެ ކާރުބާރޫ ބޮޑުވާ އެއް އެއަރޕޯޓެވެ. އެހެންކަމުން، މި ތައްޔާރީތަކުގެ ސަބަބުން ކުރިއަށް އޮތް ސީޒަނުގައި އެއަރޕޯޓުގެ ޚިދުމަތްތައް އިތުރަށް ރަނގަޅުވެ، ފަސިންޖަރުންނަށް ފަސޭހަ ތަޖުރިބާއެއް ލިބިގެންދާނެ ކަމަށް އުންމީދު ކުރެވެއެވެ.