ވަޅިން ބިރުދައްކައި އަންހެނަކު ރަހީނުކުރި މީހާ ފުލުހުންގެ ބެލުމުގެ ދަށަށް

މާލޭގައި އަންހެނަކަށް ވަޅިން ބިރުދައްކައި ރަހީނުކުރި ހާދިސާގައި އަނިޔާވި އަހްތާރު ހޮސްޕިޓަލުން މިއަދު ދޫކޮށްލުމާ ގުޅިގެން، އޭނާ މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

މިކަން މިއަދު ވަނީ ފުލުހުން ހާމަކޮށްފައެވެ.

މިދިޔަ ބުރާސްފަތި ދުވަހުގެ ރޭ މާލޭގައި ހިނގި މި ހާދިސާގައި އަންހެން މީހާއަށާއި އޭނާ ރަހީނުކުރި އަހްތާރަށް އަނިޔާވެ، ދެމީހުންނަށްވެސް ހޮސްޕިޓަލުގައި ފަރުވާ ދެވުނެވެ. އަހްތާރަށް އަނިޔާވެފައިވަނީ، އަންހެން މީހާ ސަލާމަތްކުރުމަށް އުޅުމުގެ ތެރޭގައި ފުލުހުން އޭނާގެ ބޮލުގައި މުގުރަކުން ޖެހުމުންނެވެ. އެވަގުތު އޭނާ ދިޔައީ އަންހެން މީހާގެ ކަރުގައި ވަޅި ޖައްސައިގެން ހުރެ، މަރާލާނެ ކަމަށް ބުނެ ފުލުހުންނަށް އިންޒާރު ދެމުންނެވެ.

ދެމީހުންނަށްވެސް ހޮސްޕިޓަލުގައި ފަރުވާދިނުމަށްފަހު، އިއްޔެ ދޫކޮށްލިއެވެ. އަދި އަހްތާރު ފުލުހުން ހައްޔަރުކުރިއެވެ. ނަމަވެސް އަނެއްކާވެސް ފިރިހެން މީހާ ހޮޑުލާތީވެ، ރޭގެ ވަގުތެއްގައި އަލުން އައިޖީއެމްއެޗްގެ އޮބްޒަވޭޝަނަށް ގެންދިޔައެވެ. މިކަން ކުރީ އޭނާގެ ހާލަތު އިތުރަށް ބެލުމަށް ކަމަށް ފުލުހުން ބުނެފައިވެއެވެ.

ފުލުހުންގެ އިދާރާއިން މިއަދު މީޑިއާތަކަށް ފޮނުވި މެސެޖެއްގައި ބުނެފައިވަނީ، އޮބްޒަވޭޝަނަށްފަހު މިއަދު ހޮސްޕިޓަލުން އަހްތާރު ދޫކޮށްލާފައިވާ ކަމަށެވެ. އަދި މިހާރު އޭނާ ހުރީ ފުލުހުންގެ ބެލުމުގެ ދަށުގައި ކަމަށްވެސް މެސެޖްގައި ބުނެފައިވެއެވެ.